Eurosport сарапшысы Елена Рыбакинаның US Open турниріндегі екінші матчы бойынша болжам жасады
Eurosport телеарнасының комментаторы Владас Ласицкас Sports24.kz үшін қазақстандық теннисші Елена Рыбакинаның US Open-2026 турнирінің бірінші айналымында америкалық Теа Фродинді жеңуіне баға берді.
Еске салайық, әлемнің 585-ракеткасы, америкалық Теа Фродинмен Рыбакинаның матчы бар болғаны екі сетке созылып, Қазақстан өкілінің пайдасына 6:3, 6:2 есебімен аяқталды.
«Америкалық Теа Фродинмен матчта Рыбакина үшін екі нәрсені тексеру маңызды болды. Біріншісі — Цинциннатидегі WTA 1000 сериясындағы турнирде мәселелер туындаған аяғының жағдайы. Екіншісі — турнирдің басында көп күш жұмсамау үшін кездесуді тез аяқтау. Қазақстандық екі міндетті де орындады және ойнай алатынын көрсетті», — деді Владас Ласицкас.
Әлемнің бірінші ракеткасы атану мүмкіндігі туралы
Сарапшы қазіргі таңда Рыбакинаның әлемдік рейтингте көш бастауға үлкен мүмкіндігі бар екенін атап өтті. Егер Рыбакина US Open турнирінде кем дегенде жартылай финалға жетсе, қарсыластарының нәтижелеріне қарамастан, мансабында алғаш рет ресми әлемдік рейтингті сенімді түрде басқарады. US Open турнирінің екінші айналымында Рыбакина испаниялық Джессика Бузас Манейромен кездеседі.
«Меніңше, ол қазір бұл туралы көп ойламайды. Матчтан матчқа өтіп, жай ғана ойнауы керек. Нәтиже болса, бірінші орын да келеді. Ал Джессика Бузас Манейромен келесі кездесуге келсек.
Рыбакина бірінші айналымдағыдай сенімді түрде жеңуі керек. Бірақ мұнда барлығы оның жағдайына байланысты. Егер өзін жақсы сезінсе, аяғы мазаламаса және жалпы бұрынғы теннисіне қайта оралса. Еске сала кетейін, осы маусымда ол хардта 30 матчта жеңіске жетті. Бұл — ең үздік көрсеткіш.
Ол бұл көрсеткіш бойынша америкалық Джессика Пегуламен бірге бірінші орынды бөлісіп тұр. Бұл Рыбакинаның хардта керемет ойнайтынын және мұны бәрінің білетінін көрсетеді. Барлығы ойдағыдай болуы керек. Денсаулығы да, теннисі де. Сонда бәрі жақсы болады», — деп қосты Владас Ласицкас.
Айта кетейік, биылғы турнирдің жалпы жүлде қоры 108 миллион АҚШ долларын құрайды. US Open-2026 чемпионы 5,5 миллион доллар алады. Турнирдің өтінімдер тізімінде қазақстандық теннисшіден жоғары тұрған жалғыз ойыншы — белорусиялық Арина Соболенко. Бұған дейін біз Рыбакинаның турнирдегі басты қарсыластары туралы айтып берген едік.
