«Қазақстанға деген жоғары сенімнің көрсеткіші» — Едилов Астанада УЕФА Суперкубогының өткізілуі туралы
Қазақстандық танымал футбол функционері Ербол Едилов 2028 жылы УЕФА Суперкубогы үшін матч — Чемпиондар лигасы мен Еуропа лигасының жеңімпаздары арасындағы кездесу «Астана Аренада» өтетіні туралы жаңалыққа пікір білдірді.
Бұған дейін УЕФА Атқарушы комитеті 2028 жылғы УЕФА Суперкубогы үшін матч өтетін орын ретінде Астанадағы «Астана-Арена» стадионын таңдаған болатын. Бұл 2028 жылдың тамызында қазақстандық жанкүйерлер Қазақстан астанасында Чемпиондар лигасының жеңімпазы мен Еуропа лигасының жеңімпазы арасындағы матчты тамашалай алады деген сөз.
«Қазақстан үшін бұл — үлкен оқиға. 2028 жылы Астана Чемпиондар лигасы мен Еуропа лигасының жеңімпаздары — бүкіл футбол әлемі бақылап отыратын командалар арасындағы матчты қабылдайды. УЕФА-ның шешімі елімізге халықаралық жарыстарды ұйымдастырушы ретінде деген сенімін көрсетеді.
Енді матчты жоғары деңгейде өткізіп, оған деген қызығушылықты футболды дамытуға пайдалану маңызды. Қазақстандағы балалар мен жас ойыншылар әлемдік футбол жұлдыздарын өз елінде көріп, үлкен футбол оқиғалары біздің елде де өтуі мүмкін екеніне сенсе деймін», — деді Ербол Едилов.
Бұған дейін Қазақстан футбол федерациясы мұндай деңгейдегі матчтың Қазақстанда өткізілуі бүкіл отандық спорт үшін тарихи оқиға екенін мәлімдеген болатын. ҚФФ «Астана-Арена» стадионының қайта жаңғыртылып, жоспарлы түрде жаңартылуы аренаның ірі еуропалық футбол оқиғаларын өткізуге қойылатын УЕФА-ның қатаң регламент талаптарына толық сәйкес келуін қамтамасыз ететінін атап өтті.
2009 жылы салынған «Астана-Арена» үшін бұл тарихтағы ең беделді матч болады: бұған дейін аренада елордалық «Астананың» қатысуымен Чемпиондар лигасының топтық кезеңіндегі ойындар, сондай-ақ Қазақстан ұлттық құрамасының матчтары өткен.
