«Астана-Аренада» газон ауыстырылады
«Астана-Арена» стадионының алаңындағы жасанды жабын 2028 жылы УЕФА Суперкубогы үшін матчты өткізу алдында табиғи газонға ауыстырылады. Бұл туралы Қазақстан футбол федерациясының бас хатшысы Скотт Манн мәлімдеді, деп хабарлайды Sports24.kz тілшісі.
«Астана-Арена» — әлемдік деңгейдегі стадион. Сыйымдылығы, БАҚ өкілдерінің жұмысына арналған инфрақұрылымы және басқа да барлық нысандары тұрғысынан. Бұл жоба аясындағы шарттардың бірі болды. Біз табиғи газонда ойнаймыз. Уақыт өте келе жасанды жабыннан табиғи газонға ауысамыз. Бізге келер болсақ, бұған өте қуаныштымыз. Бұл стадион әлемдегі үздік ареналардың деңгейіне сәйкес келеді деп санаймыз және мұнда керемет матчты көру мүмкіндігін асыға күтеміз», — деді Скотт Манн.
Ол сондай-ақ алдағы УЕФА Суперкубогы үшін матчтың ел экономикасына маңызды әсер ететінін атап өтті.
«Бұл — Қазақстан футбол федерациясы бірнеше жыл бойы жұмыс істеген жоба. Атап айтқанда, Федерациямыздың президенті оның басты бастамашыларының бірі болды. Әрине, халықаралық департаментіміздегі мамандардың үлесін де ерекше атап өткен жөн. Бұл — өте үлкен оқиға, біз әлемдегі ең мықты екі клубтың Қазақстанда ойнайтынын көреміз.
Бұл матчтың Қазақстанда өткізілуінің маңызы зор. Ең алдымен, сөз экономикалық үлес туралы болып отыр. Қазақстанға, Астанаға және жалпы біздің өңірге келу үшін әлемнің түкпір-түкпірінен жанкүйерлер келеді. Олар біздің инфрақұрылымымызбен танысады, қонақүйлерге, мейрамханаларға барады. Бұл — халықаралық аренаға шығу үшін маңызды жоба», — деп қосты Скотт Манн.
Алайда газонды ауыстыруға УЕФА Суперкубогының регламентіндегі талаптар себеп болады: турнир матчты жасанды алаңда өткізуге рұқсат бермейді, стадиондағы жабынның табиғи болуын талап етеді.
