Сұлтан Заурбек IBF титулы үшін үміткерлік жекпе-жегінің жаңа күнін алды
Жеңіліп көрмеген қазақстандық боксшы Сұлтан Заурбек IBF нұсқасы бойынша екінші жартылай жеңіл салмақтағы әлем чемпионы атағына үміткерлік жекпе-жегінің жаңа күнін білді, деп хабарлайды Sports24.kz.
boxrec.com мәліметінше, Заурбек австралиялық Джексон Инглэндпен жұдырықтасуы тиіс. BoxRec ақпараты бойынша, бұл тартыс 26 қыркүйекте Австралияның Квинсленд штатындағы Голд-Костта өтеді деп жоспарланған.
Бастапқыда жекпе-жек 27 маусым күні Перт қаласындағы HPC Arena-да өтуі керек болатын. Кейін ол кейінге шегеріліп, енді жаңа күн мен орын белгілі болды. Ауыстырудың ресми себебі әзірге жарияланған жоқ.
Бұл кездесуде IBF екінші жартылай жеңіл салмақтағы чемпиондық белбеуге міндетті үміткер мәртебесі сарапқа салынады. Қазір бұл титул мексикалық Эмануэль Наваррете-ге тиесілі. Заурбек пен Инглэнд арасындағы кездесудің жеңімпазы чемпиондық жекпе-жекке жолдама алады.
Заурбек жайлы не белгілі
Сұлтан Заурбек австралиялық қарсыласына қарсы айқасқа 20 кездесу – 20 жеңіспен (оның 13-і нокаутпен) келіп отыр. Соңғы рет қазақстандық былғары қолғап шебері 2025 жылғы 5 сәуірде Астанада рингке шыққан болатын.
Ол кезде Заурбек Оңтүстік Африкалық Азинга Фузилені төрешілердің бірауыздан шығарған шешімімен жеңіп, IBF Continental белбеуін иеленді.
28 жастағы Заурбек үшін алдағы айқас IBF нұсқасы бойынша толыққанды чемпиондық жекпе-жек жолындағы маңызды кезең болмақ.
