Вуковтың әсері: Рыбакина жаттықтырушысы шеттетілген кездегі және одан кейінгі нәтижелерін салыстыру
2025 жылдың қаңтарынан тамызына дейін Елена Рыбакина әдеп кодексін бұзды деген күдікпен шеттетілген жаттықтырушысы Стефано Вуковсыз ойнады. Хорват маманның оралуы әлемнің бірінші ракеткасы үшін айқын түрде оң әсер етті, деп хабарлайды Sports24.kz.
Вуков шеттетілген кезеңде Рыбакина 52 кездесу өткізіп, оның 37-сінде жеңіске жетті, 15 матчта жеңілді. Алайда бір нюанс бар: қазақстандық теннисші ТОП-10 өкілдерімен өткізген алты матчта бір-ақ рет жеңіске жетсе, ТОП-20 спортшыларымен болған он кездесуде екі рет қана басым түсті.
Вуковтың шеттетілу мерзімі аяқталғаннан кейін Рыбакинаның нәтижелері әлдеқайда жақсарды. 2025 жылдың тамызынан US Open аяқталғанға дейін ол 87 матч өткізіп, небәрі 17 рет жеңілді. Осы аралықта ТОП-10 өкілдерімен болған 26 кездесуде 19 жеңіске жетіп, ТОП-20 теннисшілерімен өткен 34 матчтың 25-інде басым түсті.
Қазақстандық теннисшінің осы кезеңдерде жинаған рейтинг ұпайларында да орасан зор айырмашылық бар. Вуков шеттетілген уақытта Рыбакина үш мыңнан сәл ғана астам ұпай жинаса, одан кейінгі кезеңде бұл көрсеткіш он жарым мыңға жетті. Дәл осы қор оған US Open қорытындысы бойынша әлемдік рейтингте көш бастауға мүмкіндік берді, ол турнирде жеңіске жеткен еді.
