Шираз жекпе-жектен бас тартқаннан кейін Жәнібек Әлімханұлын не күтіп тұр?
Жәнібек Әлімханұлының менеджері Берік Сұлтан Хамза Шираз WBO чемпиондық белбеуінен бас тартқаннан кейін қазақстандық боксшының алдағы жоспары қандай болатынын айтты. Британиялық боксшы Әлімханұлына қарсы міндетті титул қорғау жекпе-жегін өткізбей, екінші орта салмақтағы белбеуді босатты, деп хабарлайды Sports24.kz. WBO Шираз командасының шешімін 19 қыркүйекте ресми түрде растады.
Енді ұйым бос қалған белбеу үшін Жәнібектің қарсыласын анықтауы керек. Сұлтанның сөзінше, бұл мәселе алдағы бірнеше күнде шешілуі мүмкін.
«Енді не болады? Меніңше, екі-үш күннің ішінде WBO Шираз босатқан белбеу үшін кімнің жұдырықтасатынын анықтайды. Жәнібек чемпиондық жекпе-жек өткізуі керек, ал оның қарсыласын WBO ресми түрде жариялайды. Дүйсенбі немесе сейсенбі күні бәрі белгілі болады деп үміттенеміз. Одан кейін Top Rank келіссөздерді бастап, жекпе-жектің күні мен өтетін орны анықталады. Көңіл күйіміз жақсы. Ең бастысы - келесі кездесу әлем чемпионы атағы үшін өтеді», - деді Сұлтан.
Ширазға қатысты жағдай бірнеше аптаға созылды. Әлімханұлы екінші орта салмаққа ауысқаннан кейін WBO оны британиялық боксшының белбеуіне міндетті үміткер етіп белгіледі. Екі тарап тікелей келісімге келе алмай, мәселе промоутерлік саудаға дейін жетті. Алайда содан кейін Шираздың командасы міндетті титул қорғаудан бас тартып, чемпиондық белбеуді босататынын ұйымға хабарлады.
Жәнібектің өзі британиялық боксшының шешіміне сабырмен қарады. Ол Ширазға сәттілік тілеп, әрі қарай өз жолымен жүруге дайын екенін білдірді.
Әлімханұлы үшін алдағы чемпиондық жекпе-жек мансабындағы жаңа кезеңнің бастауы болмақ. Қазақстандық боксшы кәсіпқой рингтегі жолының басым бөлігін 72,6 келіге дейінгі орта салмақта өткізіп, WBO және IBF белбеулерін иеленді. 2026 жылдың жазында ол қолында қалған WBO титулын өз еркімен босатып, 76,2 келіге дейінгі екінші орта салмаққа көтерілді. Осыдан кейін орта салмақта WBO чемпионы атағы Дензел Бентлиге өтті.
Салмақ ауыстыру туралы шешім Жәнібектің мансабындағы күрделі кезеңнен кейін қабылданды. 2025 жылдың соңында оның допинг сынамасынан мельдоний табылды. 2026 жылдың қаңтарында B сынамасы да оң нәтиже көрсетті. Соның салдарынан Эрисланди Ларамен жоспарланған чемпиондық белбеулерді біріктіру жекпе-жегі өтпей қалды. Кейін IBF қазақстандық боксшыны чемпиондық атағынан айырды.
Бастапқыда WBO Әлімханұлын 2025 жылдың 2 желтоқсанынан бастап бір жылға шеттеткен еді. Кейін қазақстандық боксшы ұйым талаптарын орындаған соң жаза мерзімі қысқартылып, дисквалификациясы 2026 жылдың 10 шілдесінде аяқталды.
Осыдан кейін Жәнібек салмақ дәрежесін ауыстырып, жаңа дивизионда бірден чемпиондық белбеуге жақындады. WBO оны екінші орта салмақта міндетті үміткер ретінде бекітті.
Әлімханұлы кәсіпқой рингте әлі жеңілген жоқ. Оның еншісінде 17 жекпе-жектегі 17 жеңіс бар, соның 12-сін нокаутпен аяқтаған. Жәнібек соңғы рет 2025 жылдың сәуірінде Астанада рингке шығып, Анауэль Нгамиссенгені мерзімінен бұрын жеңді.
Енді ұзақ үзілістен кейін қазақстандық боксшы рингке бірден чемпиондық жекпе-жекпен оралуды көздеп отыр - бұл жолы жаңа салмақ дәрежесінде.
