Рыбакина Нинбодағы турнирдің жартылай финалына шыққаннан кейін өзінің басты қаруын атады
Қазақстандық теннисші Елена Рыбакина Қытайдың Нинбо қаласында өтіп жатқан WTA 500 санатындағы турнирдің ширек финалында польшалық Катажина Каваны жеңгеніне пікір білдірді, деп хабарлайды Sports24.kz.
Кездесу әлемнің бірінші ракеткасының үш сеттегі 6:1, 3:6, 6:1 есебімен жеңісімен аяқталды. Матч 1 сағат 45 минутқа созылды.
Ойыннан кейін Рыбакина кездесу барысында өз ойынындағы құбылмалылықпен күресуге тура келгенін мойындады. Қазақстандық спортшының айтуынша, шешуші сетте ол өзіне тән агрессивтілігін қайтарып, доп беруді реттеуге тырысқан.
«Бұл қиын матч болды. Мен ойынды біршама жақсы бастадым. Бәрі ойдағыдай болып, доп беруім де жақсы жұмыс істеді. Екінші сетте сәл бәсеңдеп қалдым, доп берген кезде энергия жетіспеді, қателіктерге жол бердім, ал геймдер өте тартысты өтті. Оның үстіне, кейбір сәттерде қарсыласым өте жақсы ойнады. Сондықтан екінші сетте бәрі тез өзгеріп кетті», — деді теннисші.
Рыбакина доп берудің қарсыластарға қысым жасауға мүмкіндік беретін өз ойынындағы басты элементтердің бірі болып қала беретінін де атап өтті.
«Дегенмен үшінші сетте агрессивтілігімді сақтап, өз теннисимді жалғастыра алғаныма қуаныштымын. Өз доп беру геймдерімді ұстап тұра алмадым, ал бұл — қарсыласыма қысым жасауға көмектесетін қаруым. Сондықтан үшінші сетте доп беруіме назар аударып, кейін қабылдау кезіндегі геймдерде күресуге тырыстым. Бәрі реттеліп, матчта жеңіске жеткеніме қуаныштымын», — деп атап өтті Рыбакина.
Қазақстандық теннисші жанкүйерлерге қолдауы үшін арнайы алғыс айтып, Нинбоның мансабында ерекше орын алатынын мойындады.
«Әрине, түннің бір уағына дейін қалып, мені қолдағандарыңыз үшін көп рақмет. Қытайда әрдайым ерекше жағымды атмосфера болады, ал Нинбо мен үшін айрықша орын. Тағы да рақмет. Ертең мені қолдауға келіңіздер, сіздерді көргенімізге қуанышты боламыз», — деп спортшы көрермендерге үн қатты.
Нинбодағы турнирдің жартылай финалында Рыбакина WTA рейтингінде 13-орында тұрған ресейлік Диана Шнайдермен кездеседі. Қазақстандық теннисші былтыр осы жарыста жеңіп алған титулын қорғау жолындағы күресін жалғастыруда.
Елена Рыбакина Нинбодағы турнирдің жартылай финалына шықты
