Рыбакина мен Соболенко: Бейжіңдегі турнир WTA рейтингіндегі бірінші орын үшін тартысқа қалай әсер етті
Бейжіңдегі турнир Арина Соболенкоға әлемдік рейтингтің бірінші сатысында тұрған Елена Рыбакинаға жақындауға жақсы мүмкіндік беруі тиіс еді. Алайда бәрі керісінше болды: екі теннисші де жарысты ерте аяқтады, бірақ қазақстандықтың басымдығы одан әрі артты, деп хабарлайды Sports24.kz.
China Open басталар алдында Рыбакинаның еншісінде 9901 ұпай болды. Ол ең жақын қарсыласынан 2091 ұпай алда еді. Елена үшін бұл US Open-дегі жеңістен кейінгі және әлемнің бірінші ракеткасы атанғаннан кейінгі алғашқы турнир болатын.
Жаңа мәртебедегі алғашқы жарыс сәтсіз аяқталды. Бірінші айналымды өткізіп алған Рыбакина екінші кезеңде әлемнің 118-ракеткасы Алина Чараеваға қарсы ойнады. Қазақстандық бірінші сетте 6:3 есебімен жеңгенімен, кейін екі партияда қатарынан есе жіберді - 4:6, 3:6. Бейжіңнен кейін live-рейтингте Рыбакинаның 9696 ұпайы қалды.
Еленаның ерте жеңілуі Соболенкоға арадағы айырманы айтарлықтай қысқартуға мүмкіндік берді. Егер белорусь теннисшісі Бейжіңдегі турнирді жеңіп алса, оның ұпайы 8420-ға жетіп, Рыбакинадан қалуы 1276 ұпайға дейін қысқарар еді.
Алайда Арина да бұл мүмкіндікті пайдалана алмады. Үшінші айналымда ол 20 жастағы чехиялық Никола Бартуньковадан күтпеген жерден 4:6, 3:6 есебімен ұтылды. Соның салдарынан Соболенко Рыбакинаға жақындай алмады ғана емес, өткен жылғы нәтижесіне байланысты ұпай да жоғалтты. Қазір оның live-рейтингтегі көрсеткіші - 7485 ұпай. Ал екі көшбасшы арасындағы айырма 2211 ұпайға дейін өсті.
Яғни Рыбакинаның өзі Бейжіңде ерте жеңілгеніне қарамастан, рейтинг тұрғысынан бұл турнир оған тиімді болды.
Маусымдық чемпиондық жарыста да екі теннисші арасындағы бәсеке жалғасып жатыр. Мұнда тек 2026 жылғы нәтижелер есепке алынады. Бұл көрсеткіш бойынша Рыбакинаның басымдығы азырақ: Еленада 7502 ұпай, Соболенкода 6550. Айырма - 952 ұпай. Екі теннисші де WTA қорытынды турниріне жолдама алып үлгерді.
Дегенмен алдағы апталарда жағдай тағы өзгеруі мүмкін.
Рыбакина аяқ жарақатына байланысты Уханьдағы WTA 1000 турнирінен бас тартты. Өткен маусымда ол бұл жарыста ширек финалға дейін жеткен еді, сондықтан биыл сол ұпайларын қорғай алмайды. Қазақстандық теннисші Нинбодағы турнирде кортқа қайта оралуды жоспарлап отыр. Онда ол өткен жылғы чемпиондық атағын қорғайды.
Еленаны жарақат мәселесі биыл алғаш рет мазалап отырған жоқ. Тамыз айында сол аяғындағы ауырсыну салдарынан ол Цинциннатидегі ширек финалды аяқтай алмады. Кейін US Open-ге дейін қалпына келіп, турнирді жеңіп алды және мансабында алғаш рет WTA рейтингінің бірінші сатысына көтерілді.
Соболенко болса қуғынды жалғастырып келеді. Бейжіңдегі ерте жеңіліс оның жағдайын қиындатқанымен, маусым соңына дейін бірнеше ірі турнир мен WTA Finals бар. Ол жарыстарда көп мөлшерде рейтингтік ұпай таратылады.
Еске салайық, Елена Рыбакина Бейжіңдегі турнирді күтпеген жерден екінші айналымда аяқтады. Қазақстандық Алина Чараеваға қарсы матчты жақсы бастап, бірінші сетті 6:3 есебімен алды. Алайда кейін қарсыласы ойынның тізгінін өз қолына алып, Рыбакина келесі екі партияда 4:6, 3:6 есебімен жеңілді.
Арина Соболенко бір айналым ұзағырақ ойнады. Үшінші кезеңде ол 20 жастағы чехиялық Никола Бартуньковамен кездесіп, 4:6, 3:6 есебімен ұтылды. Осылайша белорусь теннисшісі Рыбакинаның ерте сүрінгенін пайдаланып, рейтингтегі айырманы қысқарта алмады.
