Рыбакина әлемнің бірінші ракеткасы атану мүмкіндігі туралы пікір білдірді
Елена Рыбакина US Open-2026 турниріндегі сәтті өнерін жалғастырып келеді. Үшінші айналымда украиналық Юлия Стародубцеваны жеңген қазақстандық теннисші 1/8 финалға шығып, әлемдік рейтингтің бірінші сатысына тағы бір қадам жақындады, деп хабарлайды Sports24.kz.
Үшінші айналымдағы кездесуде Рыбакина қарсыласын екі сетте жеңді. Алғашқы партия өте тартысты өтіп, тай-брейкке дейін жетті. Ал екінші сетте Елена ойынды сенімді бақылауда ұстап, кездесуді өз пайдасына аяқтады - 7:6 (8:6), 6:3.
Матчтан кейін Рыбакинаға әлемнің бірінші ракеткасы атану мүмкіндігі туралы сұрақ қойылды. Оған WTA рейтингінде көш бастауға кепілдік беретін нәтижеден небәрі екі жеңіс бөліп тұрғаны айтылды.
«Мен әзірге бұл мақсатқа соншалықты жақындадым деп ойламаймын. Алда әлі біраз жол бар. Қазір мен үшін ең маңыздысы - келесі матч. Рейтинг туралы көп ойлап, алға озып кеткім келмейді. Кортқа шығып, барынша жақсы теннис көрсетуге, ойыннан ләззат алуға және соңына дейін күресуге тырысамын», - деді Рыбакина.
Елена сонымен қатар әлемдік рейтингтің бірінші сатысына көтерілу өзі үшін маңызды мақсат екенін жасырмады.
«Әрине, бұл мақсатқа жақын арада жетемін деп үміттенемін. Егер дәл қазір жүзеге аспаса, жұмысымды жалғастырып, кейін оған қайта ұмтыламын. Ең бастысы - тоқтап қалмау», - деп қосты қазақстандық теннисші.
Рыбакина биылғы US Open турнирінде әзірге бірде-бір сет жоғалтқан жоқ. Бірінші айналымда ол америкалық Теа Фродинді 6:3, 6:2 есебімен жеңсе, кейін испаниялық Джессика Боусас Манейродан 6:2, 6:4 есебімен басым түсті. Енді үшінші матчта Стародубцеваны да екі партияда жеңді.
1/8 финалда Рыбакина жапониялық Наоми Осакамен кездеседі. Бұл матчтағы жеңіс Еленаны US Open ширек финалына шығарып, әлемдік рейтингтің бірінші сатысына жеткізетін нәтижеге тағы бір қадам жақындатады.
