Елена Рыбакина US Open-дегі триумфынан кейін Алматыға келді
Әлемнің бірінші ракеткасы Елена Рыбакина АҚШ ашық чемпионатындағы жеңісінен кейін Қазақстанға келді, деп хабарлайды Sports24.kz.
Қазақстандық теннисші Instagram-дағы «сторисінде» гүл шоғының суретін жариялады. Елена геолокация ретінде Алматыны көрсетіп, жүрек эмодзиін қосты.
Бұған дейін Рыбакина Қазақстанға оралғаннан кейін жоспарланған іс-шараларға қатысып, жарақатынан кейін қалпына келу курсынан өтетіні хабарланған еді. Осыған байланысты теннисші Қазақстан құрамасы сапында Билли Джин Кинг кубогының финалдық кезеңінде өнер көрсете алмайды.
US Open-2026 турнирінің шешуші матчында Елена Рыбакина Беларусь өкілі Арина Соболенконы 6:4, 5:7, 6:2 есебімен жеңді. Бұл титул қазақстандық теннисші үшін «Үлкен дулыға» турнирлеріндегі үшінші жеңіс болды. Бұған дейін ол Уимблдон-2022 және Australian Open-2026 жарыстарында топ жарған еді. Нью-Йорктегі жеңісінен кейін қазақстандық теннисші WTA рейтингіндегі бірінші орнын сақтап, әлемнің бірінші ракеткасы мәртебесінде қатарынан екінші аптасын өткізіп жатыр.
