Қазақстанның Билли Джин Кинг кубогы-2026 матчтарының кестесі: Рыбакина финалдық кезеңге қатыспайды
Қазақстан әйелдер құрамасы Билли Джин Кинг кубогы-2026 турнирінің шешуші кезеңіне дайындалып жатыр. Финалдық бәсеке 22-27 қыркүйек аралығында Қытайдың Шэньчжэнь қаласында өтеді. Қазақстан турнирді бірден ширек финалдан бастайды, қарсылас - Испания құрамасы.
Қазақстан қашан ойнайды?
Ұлттық құраманың алғашқы және әзірге кепілдендірілген матчы 23 қыркүйекте Shenzhen Bay Sports Centre Arena кешенінде өтеді. Қазақстан - Испания кездесуі Астана уақытымен 14:00-де басталады.
Егер Қазақстан ширек финалдан өтсе, 25 қыркүйекте Чехия - Ұлыбритания жұбының жеңімпазымен жартылай финалда кездеседі. Турнирдің финалы 27 қыркүйекке жоспарланған.
Әр құрамалар арасындағы кездесу үш матчтан тұрады: алдымен екі жекелей ойын, одан кейін жұптық кездесу өтеді. Келесі кезеңге шығу үшін екі жеңіс жеткілікті.
Қазақстан Рыбакинасыз ойнайды
Ұлттық құраманың басты жоғалтуларының бірі - Елена Рыбакина. Әлемнің бірінші ракеткасы бастапқыда Қазақстанның финалдық кезеңге арналған тізіміне енген еді, алайда турнир басталар алдында Шэньчжэньде өнер көрсете алмайтыны белгілі болды.
Қазақстан теннис федерациясының мәліметінше, Рыбакинаға денсаулығын толық қалпына келтіруге уақыт қажет. Оны Цинциннатиде алған жарақаты әлі де мазалайды, сондықтан теннисші кемінде екі апта емделіп, қалыпқа келуі тиіс.
Соған қарамастан Рыбакина жарақаттан кейін US Open-де өнер көрсетіп, турнирді жеңіп алды және карьерасында алғаш рет WTA рейтингінің бірінші орнына көтерілді. Енді басты міндет - маусымның ауыр бөлігінен кейін толықтай қалпына келу.
Қазақстан құрамасында кімдер бар?
Испанияға қарсы матчқа Қазақстан сапында Юлия Путинцева, Анна Данилина, Жібек Құламбаева және Соня Жиенбаева тізімге енгізілген. Команда капитаны - Юрий Щукин.
Испания атынан Кристина Букша, Джессика Боузас Манейро, Кейтлин Кеведо, Марина Бассольс Рибера және Сара Соррибес-Тормо өнер көрсетеді.
Қазақстан финалдық кезеңге қалай шықты?
Қазақстан үздік сегіздікке жолдаманы сәуір айында Астанада жеңіп алған. Юрий Щукин шәкірттері Канада құрамасын жалпы есепте 3:1 есебімен жеңді.
Сол кездесуде Юлия Путинцева жекелей сында екі жеңіс әкелсе, жұптық матчта Анна Данилина мен Жібек Құламбаева маңызды ұпайға қол жеткізді.
Енді Қазақстан финалдық кезеңді команда көшбасшысы Рыбакинасыз бастайды. Алғашқы сынақ - 23 қыркүйекте Испанияға қарсы.
