Сметов пен Орынбасар Grand Slam турнирінде медальді өзара сарапқа салады
Қазақстандық дзюдошылар Елдос Сметов пен Талғат Орынбасар Абу-Дабиде (БАӘ) өтіп жатқан Grand Slam сериясындағы турнирдің қола медалі үшін белдеседі. Екі спортшы да 60 келіге дейінгі салмақта өнер көрсетеді, сондықтан жүлде қалай болғанда да Қазақстан өкіліне бұйырады, деп хабарлайды Sports24.kz.
Олимпиада чемпионы Елдос Сметов турнирді тәжікстандық Мехрзод Суфиевті жеңуден бастады. Қазақстандық спортшы екі «ваза-ари» ұпайын алып, келесі кезеңге өтті. 1/8 финалда ол қытайлық дзюдошы Ма Юлинмен кездесті: алдымен «юко» бағасын иеленіп, кейін белдесуді иппонмен аяқтады.
Ширек финалда Сметов әзербайжандық Балабай Агаевқа қарсы шықты. Белдесу Әзербайжан өкілінің жеңісімен аяқталды: ол «ваза-ари» ұпайын еншіледі.
Талғат Орынбасар да бірнеше кезеңнен сәтті өтті. 1/8 финалда ол ресейлік Турпал Хабибулаевпен кездесті. Екі спортшы да бір-бір «ваза-ари» ұпайынан жинағанымен, қосымша «юко» бағасы қазақстандыққа жеңіс әкелді.
Келесі белдесуде Орынбасар британдық Чарли Эйрден басым түсіп, иппонмен жеңіске жетті. Алайда жартылай финалда қазақстандық дзюдошы тәжікстандық Лоик Кудбудиновқа есе жіберді.
Осылайша, Сметов пен Орынбасар өзара белдесуде қола медаль иегерін анықтайды.
Айта кетейік, Сметов пен Орынбасар осы маусымда ірі халықаралық жарыстарда күміс медаль жеңіп алған. Елдос қыркүйекте аяқталған Азия ойындарында күміс жүлдегер атанса, Талғат мамыр айында Астанада өткен Grand Slam турнирінің финалына дейін жетті.
Турнирдің финалдық блогындағы белдесулер 29 қазанға жоспарланған. Халықаралық дзюдо федерациясының (IJF) рейтингтік жүйесіне сәйкес, Grand Slam турниріндегі қола медаль иегеріне 500 рейтингтік ұпай береді.
