Алматыда жатақханасы мен медициналық кешені бар гимнастика орталығы салынады
Алматыда Қазақстан гимнастика федерациясының спорт залдары, жатақханасы және медициналық-сауықтыру кешені орналасатын мамандандырылған орталығын салу жоспарлануда. Жоба мемлекеттік сараптаманың оң қорытындысын алды, деп хабарлайды Sports24.kz Қазақстанның Өнеркәсіп және құрылыс министрлігіне сілтеме жасап.
Нысан қаланың Алатау ауданында, №13 шағынаудандағы 3/1 учаскесінде бой көтереді. Тапсырыс беруші — Алматы қаласының Құрылыс басқармасы, ал жобаның бас жобалаушысы — «ҚазҒЗЭнергияжәнеБайланыс» ЖШС.
Жаңа орталықта спорттық және көркем гимнастика, батутта секіру, аэробтық гимнастика және спорттық акробатика залдары қарастырылады. Сондай-ақ жоба жарыстар өткізуге арналған әмбебап залды, хореография және балалар гимнастикасымен айналысуға арналған бөлмелерді қамтиды.
Спорттық инфрақұрылымнан бөлек, кешенде медициналық және қалпына келтіру орталығы, әкімшілік бөлмелер мен жатақхана жабдықталады.
Жобалық құжаттамаға сәйкес, орталық негізгі, жастар және жасөспірімдер санаттарындағы 670-тен астам спортшыны даярлауға есептелген.
Жаңа кешен түрлі жастағы гимнасшыларды дайындауға, жарыстар өткізуге және Алматыда гимнастиканы одан әрі дамытуға арналған алаңға айналуы тиіс.
