«Борат» фильмінің авторы қазақтардан кешірім сұрады: фильм туралы Шавкат Рахмонов не деді

Борат Сагдиевтің рөлін сомдаған британдық актер Саша Барон Коэн фильмдегі Қазақстан бейнесі үшін қазақтардан кешірім сұрады. Артист өз кейіпкері үшін неліктен дәл Қазақстанды таңдағанын түсіндірді, деп хабарлайды Sports24.kz.

Happy Sad Confused подкастында Коэн өзінің кейіпкерінің шынайы Қазақстанға еш қатысы жоқ екенін мойындады.

«Қазақстан халқынан кешірім сұрағым келеді, өйткені Бораттың Қазақстанға еш қатысы жоқ», - деді актер.

Коэннің айтуынша, кейіпкердің ұлты жоба мен оны қаржыландырған телеарнаға қарай өзгеріп отырған. Әртүрлі кезеңде Борат Албания мен Молдованың тумасы ретінде таныстырылды. Кейіпкердің кезекті нұсқасына басқа ел қажет болғанда, актер әңгімелесушілері ол туралы көп нәрсе білмейді деп ойлаған Қазақстанға тоқтаған.

Коэн бұл кейіпкер арқылы бейтаныс ел туралы ең абсурдты оқиғаларға сенуге дайын адамдардың надандығын әжуалағысы келгенін түсіндірді. Сонымен қатар ол Қазақстан елшілігінің, соның ішінде кейіпкердің сыртқы келбеті мен ерекше мұртына қатысты наразылықтарын еске алды. Енді актер Қазақстан тарапының көңілі толмауына негіз болғанын мойындады.

Шавкат Рахмонов «Борат» фильмі туралы не деген еді?

Қазақстандық UFC файтері Шавкат Рахмонов бұған дейін комедияны сынға алған болатын. Ол сұхбатында фильмді Қазақстан үшін қорлық деп атап, елді Бораттың бейнесі арқылы көрсету туралы шешімге теріс баға берді.

«Бұл, әрине, нағыз ақымақтық. Олардың елі үшін бұл қалыпты жағдай екенін түсінемін. Бірақ біз үшін бұл — қорлық. Еліміздің осылай көрсетілгенін ұнатпаймыз. Бізде бәрі мүлде басқаша. Әрине, кемшіліктеріміз бар. Бірақ мұндай дәрежеде емес. Егер «Борат» бізге келсе, оны нақты өлтіреді», - деген еді Рахмонов Нина Мари-Даниэльге берген сұхбатында.

«Борат» 2006 жылы экранға шығып, АҚШ-қа репортаж жасауға барған қазақстандық ойдан шығарылған тележүргізуші туралы баяндайды.