Сметов пен Әбужақынова Азия ойындарының финалына шықты
Париж Олимпиадасының чемпионы Елдос Сметов пен Қазақстанның ең атақты дзюдошысы Әбиба Әбужақынова Азия ойындарының финалына шықты, деп хабарлайды Sports24.kz.
ҚР Туризм және спорт министрлігінің Спортты дамыту дирекциясының баспасөз қызметі хабарлағандай, Айти-Нагояда ХХ жазғы Азия ойындары аясындағы дзюдодан жарыс жалғасып жатыр.
60 келіге дейінгі салмақ дәрежесінің басты фавориттерінің бірі Елдос Сметов жартылай финалда Қытай Тайбэйінің өкілі Юнг-Вей Янгпен кездесті. Нәтижесінде қазақстандық спортшы «ваза-ари» бағасының арқасында жеңіске жетті.
Сондай-ақ Қазақстанның 29 жастағы өкілі Әбиба Әбужақынова 48 келіге дейінгі салмақ дәрежесінің жартылай финалында Тайбэйден келген Линь Чэньхаоны жеңді.
Белдесудің аяқталуына бір жарым минут қалғанда қазақстандық спортшы сәтті әдіс жасап, ұпай алды. Бұл жеңіске жетіп, финалға шығуына жеткілікті болды.
Айта кетейік, бүгін әйелдер арасындағы 48 және 52 келіге дейінгі, сондай-ақ ерлер арасындағы 60 және 66 келіге дейінгі салмақ дәрежелерінде жүлдегерлер анықталады.
