Төрехан Сабырхан өзбекстандық боксшыны ойсырата жеңіп, Азия ойындарының финалына шықты
70 келіге дейінгі салмақта өнер көрсететін қазақстандық боксшы Төрехан Сабырхан Жапонияның Айти және Нагоя қалаларында өтіп жатқан 2026 жылғы Азия ойындарының финалына жолдама алды, деп хабарлайды Sports24.kz.
Жартылай финалдық жекпе-жекте Қазақстан өкілі өзбекстандық Шавкатжон Болтаевпен кездесті.
Сабырхан алғашқы минуттардан-ақ бастаманы өз қолына алды. Қазақстандық боксшы орта қашықтықта комбинациялық мәнерде әрекет етіп, қарсыласының шабуылдарынан жалтарып, қарсы соққыларымен жауап берді. Болтаев көбіне жеке соққыларға жүгініп, оның ішінде денеге соққы жасауға тырысты. Бірінші раундта бес төрешінің барлығы Сабырханға басымдық берді — 5:0.
Екінші раундта қазақстандық боксшы аяқ жұмысы мен дәл шабуылдарының арқасында жекпе-жек барысын бақылауын жалғастырды. Сабырхан қарсыласының соққыларынан сәтті жалтарып, түрлі деңгейге комбинациялар жасап, апперкот үшін мүмкіндік тауып отырды. Бұл раунд та оның пайдасына 5:0 есебімен аяқталды.
Үшінші үш минуттықта Болтаев жекпе-жек барысын өзгертуге тырысып, бір сәтте Сабырханды арқанға қарай ығыстыра бастады. Алайда қазақстандық боксшы тиімді қорғанып, қарсы шабуылдарымен жауап беруді жалғастырды.
Үш раундтың қорытындысы бойынша барлық төреші жеңісті бірауыздан Төрехан Сабырханға берді — 5:0. Қазақстандық боксшы Азия ойындарының финалына шығып, алтын медаль үшін таласады.
Бұған дейін ширек финалда Сабырхан Ирак өкілі Али Ас-Сараимен кездескен еді. Қазақстандық боксшы қарсыласын денеге жасаған соққысымен нокдаунға түсіріп, кейін ирактық спортшы жекпе-жекті жалғастыра алмады.
Осылайша, Сабырхан бокстан Қазақстан құрамасына Азия ойындарында медальді қамтамасыз еткен спортшылардың біріне айналды. Бұған дейін Алуа Балкибекова, Наталья Богданова және Махмұд Сабырхан жүлдеге ие болған еді.
Азия ойындарының алтыны үшін Қазақстан құрамасының капитаны Айбек Оралбай да бақ сынайды.
