Өрт төрт құрлық чемпионатының Астанадан Алматыға ауыстырылуына себеп болды
2027 жылғы мәнерлеп сырғанаудан төрт құрлық чемпионаты Астананың орнына Алматыда өтеді. Мұндай шешімді Халықаралық конькимен жүгірушілер одағының (ISU) Кеңесі Швейцарияның Лозанна қаласында өткен отырысында қабылдады, деп хабарлайды Sports24.kz.
Бастапқыда жарысты 9-14 ақпан аралығында Астанада өткізу жоспарланған болатын. Алайда елорданың сол жағалау бөлігін энергиямен қамтамасыз ететін электр станциясында өрт шыққаннан кейін турнир Алматыға ауыстырылды.
«Ауыстыру Астананың сол жағалау бөлігіне қызмет көрсететін электр станциясында болған өрттен кейін Қазақстанның конькимен жүгіру федерациясымен келісім бойынша жүзеге асырылды. Бұл жағдай бастапқыда жарыс өтетін орын ретінде таңдалған қалалық нысанның жұмысына да, қауіпсіздігіне де әсер етті», — делінген ISU мәлімдемесінде.
Турнир жоспарланған мерзімде «Алматы Арена» мұз айдынында өтеді.
Бұл қандай жарыс?
Төрт құрлық чемпионаты — ISU қамқорлығымен өтетін халықаралық жарыс. Оған Азия, Африка, Америка және Океаниядан келген мәнерлеп сырғанаушылар қатысады.
Турнир мәнерлеп сырғанаудан өтетін басқа құрлықтық біріншіліктердің баламасы саналады. Оның басты ерекшелігі — жарысқа Америка, Азия, Африка және Океания спортшылары қатысады, ал Еуропа чемпионатында Еуропа елдерінің өкілдері бақ сынайды.
2025 жылы турнирде қазақстандық мәнерлеп сырғанаушы Михаил Шайдоров жеңіске жетті. Сол кезде бұл алтын медаль оның мансабындағы ең үлкен жетістігі еді. Кейін ол Олимпиада чемпионы атанды.
Төрт құрлық чемпионатының Қазақстанда өткізілуі отандық мәнерлеп сырғанау үшін тарихи оқиға болар еді: бұған дейін еліміз мұндай деңгейдегі жарысты қабылдаған емес.
2025 жылы өткен төрт құрлықтың алдыңғы чемпионатында қазақстандық мәнерлеп сырғанаушы Михаил Шайдоров жеңіске жетіп, кейін Олимпиада чемпионы атанды.
