RAF турнирі алдында Царукян мен Деннистің төбелесі: Чимаев мәлімдеме жасады
UFC-дің бұрынғы чемпионы Хамзат Чимаев Лас-Вегаста (АҚШ) RAF 14 турнирі алдындағы баспасөз конференциясында болған ресейлік файтер Арман Царукян мен америкалық Диллон Деннистің төбелесіне қатысты пікір білдірді, деп хабарлайды Sports24.kz.
Жанжалға Деннистің Чимаевқа бағытталған арандатушылық сөздері және америкалық спортшының Хамзат бейнеленген қорлайтын суреті бар жейдесі себеп болды. Күзет қызметі файтерлерді ажыратқанымен, көп ұзамай жағдай жаппай төбелеске ұласты.
Чимаев Деннистің спорттағы жетістіктеріне күмән келтіріп, ол туралы өткір пікір білдірді.
«Ол (Деннис — ред.) сонша бос сөз айтады, бауырым, бірақ өзі ешқашан ештеңе істемейді. Оның бірде-бір жекпе-жекте жеңгенін көрген емеспін. Олар бұл ақымақты мұнда не үшін алып келгенін түсінбеймін. Менің айналамда күзет көп, сондықтан ол өзіне осындай нәрсеге жол береді. Жалғыз қалғанда ешқашан ештеңе айта алмайды», — деп Чимаевтың сөзін MMAJunkie келтіреді.
Еске салайық, маусым айында RAF 10 турнирінде Чимаев Денниспен күрес кездесуін өткізіп, америкалық спортшы дисквалификацияланғаннан кейін жеңіске жеткен еді. Деннис ережеде тыйым салынған әдісті қолдануға тырысты. Жекпе-жек тоқтатылғаннан кейін жанжал жалғасты: Чимаев қарсыласын теуіп жіберді, содан соң екі команданың өкілдері арасында жаппай төбелес болды.
RAF 14 турнирі 24 қазанда өтеді. Кештің басты жекпе-жегінде Царукян мен Деннис кездеседі.
