«Оларды әлдеқашан есептен шығару керек еді»: Қазақстанның аңызға айналған жаттықтырушысы әйелдер күресінен ұлттық құрама туралы қатты айтты

Қазақстанның әйелдер күресінен ұлттық құрамасының бұрынғы бас бапкері Саржан Жақсыбеков Астанада өткен үйдегі әлем чемпионатының қорытындысын шығарып, отандық күрес мектебінің мәселелері туралы пікір білдірді. Маман қазақстандық спортшылардың өнеріне қатаң баға беріп, команданың басты үмітін атады және мемлекеттік марапат туралы жаңалықтан кейін эмоциясын неге тежей алмағанын айтып берді, деп хабарлайды Sports24.kz «БЕС ДОПИНГА» арнасына сілтеме жасап.

Жақсыбековтің пікірінше, әлем чемпионатында әйелдер құрамасының көрсеткен нәтижесі көңіл көншітпеді. Жаттықтырушы команданың құрамын жаңартып, жас спортшыларды көбірек тарту қажет деп санайды.

Сонымен қатар ол 50 келіге дейінгі салмақта қола медаль жеңіп алған Зейнеп Баяноваға арнайы тоқталды. Маман оны ерекше спортшы деп атап, енді Олимпиада ойындарына дайындықты сауатты құру маңызды екенін айтты. Мақсат жай ғана қатысу емес, олимпиялық медаль үшін күресу болуы тиіс.

«Астанадағы қыздарымыздың өнері — сұмдық, мұнда талқылайтын ештеңе жоқ. Шындықты мойындайтын кез келді: құрамда кешегі күннің спортшылары бар, оларды әлдеқашан есептен шығарып, жастарға жол беру керек. Жанға қуаныш сыйлайтын жалғыз жарқын сәт — 50 келіге дейінгі салмақтағы Зейнеп Баянова. Ол — бірегей спортшы, маңдай термен келген қола жүлдені жеңіп алды. Бірақ ендігі басты міндет — оны титықтатып алмау, Олимпиада ойындарына дұрыс дайындау», — деді Жақсыбеков.

Сондай-ақ маман мемлекеттік марапат — «Құрмет» орденін алғаннан кейінгі эмоциясы туралы айтты. Жаттықтырушының сөзінше, марапатқа ұсынылғаны туралы жаңалықты ол көлік жүргізіп келе жатып естіген. Бұл туралы білген сәтте көз жасын тыя алмағанын мойындады.

Жақсыбеков өзінің көп жылғы еңбегінің мойындалуы мансабы бойы тап болған сыннан кейін ерекше маңызды болғанын атап өтті.

«Шәкірттерімнің медальдары — команда үшін, ортақ еңбек үшін шынайы мақтаныш. Ал бұл орден — жеке басыма арналған, көптен күткен мойындау. Ұзақ жылдық жұмысым барысында менің атыма тым көп әділетсіз сын айтылып, қырын көзқарас болды», — деді маман.

Жақсыбековтің басшылығымен Қазақстанның әйелдер құрамасы қатарынан сегіз әлем чемпионатында медаль жеңіп алды. Бұдан бөлек, команда Азия ойындарында алтын алып, Олимпиада тұғырына екі рет көтерілді.

2008 жылы Бейжіңде өткен Олимпиадада Елена Шалыгина қола медаль жеңіп алса, төрт жылдан кейін Лондонда дәл осындай нәтижеге Гюзель Манюрова қол жеткізді. Сондай-ақ жаттықтырушы 2007 жылғы лицензиялық әлем чемпионатында Қазақстанның командалық есепте екінші орын алғанын еске салды. Ол додаға 100-ден астам елдің өкілдері қатысқан.

Жақсыбеков Қазақстанда әйелдер күресінің дамуына кедергі келтіріп отырған жүйелі мәселелерге де арнайы назар аударды. Негізгі себептердің қатарында жеткіліксіз қаржыландыру мен халықаралық оқу-жаттығу жиындарының өтпей қалуын атады.

«Күрес — тұрақты тәжірибе алмасу мен әлемнің үздік мектептері өкілдерімен спаррингтер өткізілмесе, құлдырайтын спорт түрі», — деп санайды жаттықтырушы.

Сонымен бірге маман Еркін Оқасовтың Қазақстан күрес федерациясына келуінен кейін өзгерістер болады деп үміт білдірді. Ол Күрес академиясының ашылғанын атап өтіп, жаңа басшылық командасына сенетінін айтты.

Қазір Саржан Жақсыбеков ұлттық құрамалардағы күнделікті жұмыстан қол үзіп, Қарағанды спорт ардагерлері одағының қызметімен айналысып жүр. Алайда күреспен байланысын толық үзген жоқ: аптасына бірнеше рет өзі де жаттықтырушы болған ұлының залына барып, жас спортшыларға кеңес береді және олардың техникалық қателерін талдайды.