«Бұл миссияны да орындадық»: Фатима Супығалиева жасөспірімдер Олимпиадасындағы алтыны және әкесінің реакциясы туралы айтты
Қазақстандық дзюдошы Фатима Супығалиева Дакарда өткен жасөспірімдер Олимпиадасында алтын медаль жеңіп алуына қатысты пікір білдірді. Спортшы жеңісінен кейін әкесінің реакциясы және алдағы спорттық мақсаттары туралы да айтып берді, деп хабарлайды Sports24.kz Informsports.kz-ке сілтеме жасап.
Жарыстың 52 келіге дейінгі салмақтағы финалында Сұпығалиева португалиялық София Гаспарды жеңді. Қазақстандық спортшы үшін бұл жеңіс халықаралық аренадағы сәтті өнерінің жалғасы болды: бұған дейін ол кадеттер арасындағы әлем чемпионатында жеңімпаз атанған.
Шешуші белдесуден кейін спортшы эмоциясын тежей алмады. Өйткені ол бұл нәтижеге дзюдомен айналыса бастаған алғашқы күннен бастап әкесі мен бапкерлерімен бірге ұмтылды.
«Финалда жеңіске жеткеннен кейінгі алғашқы ойым: “Бұл миссияны да орындадым” болды. Сол сәтте эмоцияға беріліп кеттім. Өзімді ұстай аламын деп ойлағанмын, бірақ олай болмады. Дәл осы медальді, Дакардағы дәл осы Олимпиаданы әкеммен және бапкерлеріммен бірге дзюдоға келген алғашқы күннен бастап күттік әрі жоспарладық. Бірлескен күш-жігеріміздің арқасында осы нәтижеге қол жеткіздік», - деді Сұпығалиева сұхбатында.
Сұпығалиева финалда жеңісті қалай жұлып алды
Португалиялық дзюдошымен болған шешуші кездесу оңайға түскен жоқ. Финал алдында бапкерлер штабы оң қолмен жұмыс істеуге басымдық берген еді. Алайда белгілі бір сәтте қазақстандық спортшы томоэ-нагэ әдісін орындауға тырысып, қателік жіберді де, өзі ұстап тұру тәсіліне түсіп қалды.
«Қойылған тапсырманы жақсы орындап келе жаттым, бірақ бір сәтте томоэ-нагэ әдісін орындау кезінде қателік жібердім. Бұл әдісті жасап көруге тырыстым, алайда өзім ұстап тұруға түсіп қалдым. Сол кезде: “Жоқ, мен мұнда жеңу үшін келдім” деп ойладым. Міндетті түрде босап шығуым керектігін түсіндім және бар күшімді салдым. Қолымнан келетініне сендім, сондықтан абдырап қалған жоқпын», - деп еске алды чемпион.
Сұпығалиева ұстап тұрудан босап шығып, бастаманы өз қолына алды және ақырында жекпе-жекті өзі ұстап тұру әдісімен аяқтады. Спортшының айтуынша, партердегі күрес - дзюдодағы ең сүйікті элементтерінің бірі.
Сонымен қатар Фатима турнирдегі ең қиын қарсыласын атаған жоқ.
«Қарсыластардың әрқайсысы өте мықты. Біз олардың әрқайсысын зерттеп, әрқайсысына жеке жоспар құрдық. Олармен кездесіп, мүмкіндігімнің барлығын көрсетуге дайын болдым», - деді дзюдошы.
Жарақат және үміт қысымы
Әлем чемпионатынан кейін жасөспірімдер Олимпиадасына дайындық оңай болған жоқ. Бұған жаттығу үдерісін қиындатқан жарақат себептердің бірі болды. Сонымен қатар әлем біріншілігіндегі жеңістен кейін қазақстандық спортшыдан тағы бір айтулы нәтиже күтілді.
«Әлем чемпионатынан кейін бұл Ойындарға дайындалу оңайға соқпады, оған жарақат та әсер етті. Бірақ бәрін еңсере алдық. Мен күрес мәнерімді түбегейлі өзгерткен жоқпын - бапкерлер қойған тапсырмаларды ғана орындадым. Әрине, аздап қобалжыдым, өйткені қазақстандықтар менен алтын медаль күтетінін білдім. Үнемі: “Не болса да, алтын алуға тиіспін” деп ойладым. Әр белдесуге осындай көңіл күймен шықтым», - деді Сұпығалиева.
Жеңістен кейін әкесі көз жасын тыя алмады
Спортшы үшін ең әсерлі сәттердің бірі оның алғашқы бапкері болып саналатын әкесі Алтынбек Сұпығалиевпен сөйлесуі болды. Финалдан кейін олар бейнебайланыс арқылы сөйлесті.
«Ол қатты қуанды: күлімсіреді, күлді және жылады. “Таңертеңнен бері бұл бөлмеден шыққан жоқпын - тек сенің өнер көрсетуіңді көріп отырдым”, - деді. Мен оның үміті мен маған деген сенімін ақтағым келді. Мұны жасай алғаныма өте бақыттымын», - деді Фатима.
Дзюдошы жеңіске ұзақ масаттанбайтынын да атап өтті. Оның айтуынша, қысқа мерекеден кейін жұмысқа оралып, шеберлікті шыңдауды жалғастыру қажет.
«Ең бастысы - жұлдыз ауруына шалдықпау. Жеңістен кейін бір-екі күн қуануға болады, содан кейін қайтадан жаттығып, еңбек ету керек. Олимпиада аяқталды, ал келесі жаттығуда сен қайтадан ешкім емессің, бәрін еңбегіңмен дәлелдеуге тиіссің. Бұл - менің басты қағидам», - деп атап өтті чемпион.
Жасөспірімдер Олимпиадасынан кейін Сұпығалиеваның қандай мақсаттары бар
Алдағы уақытта қазақстандық спортшы ересектер арасындағы жарыстарға ауысып, Азия және әлем чемпионаттарында медаль үшін күресуді көздейді. Негізгі міндеттердің бірі - 2028 жылы Лос-Анджелесте өтетін Олимпиада ойындарына іріктеуге дайындалу.
«Басты міндеттердің бірі - 2028 жылғы Олимпиада ойындарына іріктеу үшін рейтингтік ұпайларды дер кезінде жинау. Бапкерлермен жұмысты жалғастырамыз. Менің қателіктерім болды, оларды талдап, болашақта қайталамауға тырысамыз. Бұдан да жақсы нәтижелер көрсету үшін үнемі жетіліп, өзіңмен жұмыс істеу керек», - деді Сұпығалиева.
Айта кетейік, бұған дейін Фатима жасөспірімдер арасындағы Азия ойындарында және кадеттер арасындағы әлем чемпионатында жеңімпаз атанған. Енді қазақстандық дзюдошының алдында жаңа міндет тұр - ересектер санатындағы ең мықты спортшылардың қатарында орнығу.
