«Сен ең мықтысың, бауырым»: қазақстандықтар Ризабек Айтмұханды Садулаевтан жеңілгеннен кейін қолдады
Қазақстандық жанкүйерлер Астанада өтіп жатқан еркін күрестен әлем чемпионатында ресейлік балуан Абдулрашид Садулаевтан жеңілгеннен кейін Ризабек Айтмұханды қолдады, деп хабарлайды Sports24.kz.
Instagram желісіндегі белдесу жарияланымының астына пікір қалдырған қолданушылар қазақстандық балуанды батыл күресі үшін мақтап, нәтижеге бола мұңаймауға шақырды.
«Әдемі күресті, жабылып қалмады, шабуылдады!!!! Ол үшін қуаныштымын!!!! Ең бастысы — сақтық танытпай, алға ұмтылды!!!! Жеңістер әлі алда!!!!» — деп жазды қолданушылардың бірі.
Басқа жанкүйерлер де Айтмұханның болашағына сенім білдірді.
«Жаным, сен ең мықтысың, бұл тек бастамасы», — деп жазды қолданушы қыз.
«Сен ең мықтысың, бауырым», — деп спортшыны тағы бір пікір иесі қолдады.
Кейбір қолданушылар қазақстандық балуанның 2028 жылы Лос-Анджелесте өтетін Олимпиада ойындарындағы мүмкіндігі туралы да айта бастады.
«97 келіге дейінгі салмақтағы Лос-Анджелес-2028 ойындарының чемпионы — біздің Ризабек, Құдай қаласа», — деп жазды жанкүйерлердің бірі.
Тағы бір қолданушы алдағы жылдары Айтмұханның әлемнің үздік балуандарымен, соның ішінде Садулаевпен, америкалық Кайл Снайдермен және ирандық Ахмад Язданимен бәсекеге түсе алатынын айтты.
«2027–2028 жылдар Ризабектің жылдары болады, көресіздер. Келер жылдан бастап Снайдерді, Садулаевты және Язданиді біртіндеп әрі сенімді түрде басып озамыз. Осы пікірді сақтап қойыңыздар», — деп жазды жанкүйер.
Дегенмен пікірлер арасында сын айтқандар да болды. Қолданушылардың бірі қазақстандық балуанның жылдамдығына назар аударып, оған жеңілірек салмақ дәрежесіне ауысуды қарастырған жөн деген болжам жасады.
Сонымен қатар көптеген жанкүйер спортшыны қолдауын жалғастырып, оны батыр әрі чемпион деп атады.
«Жарайсың! Батырсың, біз үшін сен ең мықтысың», — деп жазды қолданушылардың бірі.
Еске салайық, Ризабек Айтмұхан Астанада өтіп жатқан күрестен әлем чемпионатындағы алғашқы белдесуінде жеңіліп қалды.
97 келіге дейінгі салмақта еркін күрестен сынға түсетін отандасымыз іріктеу кезеңінде Ресей өкілі, екі дүркін Олимпиада және алты дүркін әлем чемпионы Абдулрашид Садулаевпен кездесті. Айтмұхан қарсыласына 1:4 есебімен есе жіберді.
Садулаев ширек финалда АҚШ-тан келген Олимпиада чемпионы Кайл Снайдерден жеңіліп, финалға шыға алмағаннан кейін Ризабек қола медаль үшін күресу мүмкіндігінен айырылды.
2023 жылғы әлем чемпионы Ризабек Айтмұхан елордадағы әлем чемпионатын медальсыз аяқтады.
