Қазақстандық балуан Үндістаннан келген қарсыласын ойсырата жеңіп, әлем чемпионатының жүлдесін иеленді
Грек-рим күресінен Қазақстан құрамасының өкілі Асхар Құрбаев Астанада өтіп жатқан 2026 жылғы әлем чемпионатының қола жүлдегері атанды, деп хабарлайды Sports24.kz.
55 келіге дейінгі салмақ дәрежесінде үшінші орын үшін өткен белдесуде Қазақстан өкілі үндістандық балуан Лалитпен кездесті.
Белдесу Құрбаевтың 9:0 есебімен сенімді жеңісімен аяқталды. Қазақстандық балуан қарсыласын ұпай алуға мүмкіндік бермей, тартыстың барысын толық бақылауында ұстады.
Айта кетерлігі, турнир қарсаңында Құрбаев Біріккен әлем күресі (UWW) ұйымының әлемдік рейтингінде небәрі 37-орында тұрған еді, ал оның үндістандық қарсыласы сегізінші сатыда орналасқан болатын.
Осылайша, қазақстандық балуан рейтингі жоғары қарсыласынан басым түсіп, өз алаңында өтіп жатқан әлем чемпионатында ұлттық құраманың жүлделер қоржынына тағы бір медаль қосты.
