«Реал» Эль-Класико алдында алаңдатарлық статистикаға тап болды: Лунин сәтсіз серияны үзуге тырысады
Мадридтік «Реалдың» қақпашысы Андрей Лунин Испания Ла Лигасының оныншы туры аясында «Барселонаға» қарсы өтетін матчта негізгі құрамда шығуы мүмкін, деп хабарлайды Sports24.kz.
«Ақтардың» негізгі қақпашысы Тибо Куртуа тұмауына байланысты Эль-Класикоға қатыспайды. Осылайша, 27 жастағы украиналық футболшы осы маусымда алғаш рет мадридтік команда сапында алаңға шығу мүмкіндігіне ие болды.
Алайда Луниннің каталондық клубпен кездесулердегі статистикасы біркелкі емес. Қақпашы төрт Эль-Класикоға қатысып, бұл матчтардың үшеуінде «Реал» жеңіске жетсе, бірінде жеңіліс тапқан.
Дегенмен украиналық қақпашы әзірге бірде-бір рет қақпасын голдан аман алып қала алмады. «Барселонаға» қарсы өткен төрт кездесуде ол жеті гол жіберіп алған.
Бұдан бөлек, алдағы матч Лунин үшін сырт алаңдағы алғашқы Эль-Класико болмақ. Бұған дейін оның қатысуымен өткен төрт кездесудің барлығы мадридтіктердің өз стадионында немесе бейтарап алаңда ұйымдастырылған.
Украиналық қақпашы соңғы рет «Барселонаға» 2024 жылғы қазанда қарсы ойнады. Сол кезде мадридтіктер 0:4 есебімен ойсырай жеңілген.
«Барселона» — «Реал» матчы 25 қазанда «Камп Ноу» стадионында өтеді. Кездесу Қазақстан уақытымен 26 қазанға қараған түні 01:00-де басталады.
