Қазақстан Дүниежүзілік көшпенділер ойындарында көк бөріден Қырғызстанға финалда есе жіберді
Бішкекте өтіп жатқан VI Дүниежүзілік көшпенділер ойындарында көк бөріден финалдық кездесу аяқталды. Алтын жүлде үшін Қазақстан мен Қырғызстан құрамалары сынға түсті, деп хабарлайды Sports24.kz.
Алаң иелері алғашқы минуттардан-ақ басымдықты қолға алып, қазақстандық командаға ойын барысын өзгертуге мүмкіндік бермеді. Үш кезеңнің қорытындысы бойынша Қырғызстан 12:0 есебімен жеңіске жетті.
VI Дүниежүзілік көшпенділер ойындары. Көк бөрі. Финал
Қырғызстан - Қазақстан - 12:0
Осылайша, Қырғызстан құрамасы көк бөріден Дүниежүзілік көшпенділер ойындарының чемпионы атанды. Қазақстан жарысты күміс жүлдемен аяқтады.
Алайда екі құраманың бәсекесі мұнымен бітпейді. Бүгін Қазақстан мен Қырғызстан тағы бір шешуші кездесуде - бұл жолы көкпар финалында жолығады.
Қазақстан құрамасы үшін бұл Дүниежүзілік көшпенділер ойындарын басты ұлттық спорт түрлерінің бірінде жеңіспен аяқтаудың мүмкіндігі. Қазақстан көкпар финалына турнирдің қазіргі чемпионы ретінде шығады.
Қазақстан - Қырғызстан арасындағы көкпар финалының тікелей трансляциясы осы сілтеме арқылы қолжетімді.
VI Дүниежүзілік көшпенділер ойындары Бішкекте 31 тамыз бен 6 қыркүйек аралығында өтіп жатыр. Жарыстың соңғы күнінде турнирдің соңғы чемпиондары анықталады.
