2026 жылғы Азия ойындарының жетінші күнінің қорытындысы: Қазақстан бес медаль жеңіп алды
Айти мен Нагояда өтіп жатқан 2026 жылғы жазғы Азия ойындарының жетінші жарыс күні Қазақстан құрамасына тағы бес медаль әкелді. Бұл күні ескек есуден байдарка мен каноэде өнер көрсеткен спортшылар үш жүлде жеңіп алды. Қазақстандықтар бұған қоса оқ атудан және семсерлесуден тағы екі қола медаль иеленді, деп хабарлайды Sports24.kz.
Байдарка мен каноэде үш қола медаль
Қазақстандық спортшы Стелла Суханова 500 метр қашықтыққа байдарка-одиночка жарысының финалында қола медаль жеңіп алды. Ол жарысты 1:59,688 нәтижесімен аяқтады. Бұл Суханованың осы Азия ойындарындағы екінші медалі. Бұған дейін ол байдарка-төрттіктің құрамында үшінші орын алған болатын.
Ерлер арасында дәл осы қашықтықтағы финалда Дмитрий Холмогоров қола жүлдегер атанды. Қазақстандық спортшы 500 метрді 1:44,453 уақытта бағындырды. Алтын медальді Өзбекстан өкілі Шахриёр Махкамов жеңіп алса, күміс жүлде Оңтүстік Корея спортшысы Джан Сан Вонға бұйырды.
Ескек есуден Қазақстан қоржынына тағы бір қола медальді Сергей Емельянов пен Руфина Искакова салды. 500 метр қашықтықтағы каноэден аралас экипаждар арасындағы финалда қазақстандық жұп 1:51,124 нәтижесімен үшінші орын алды. Қытай жеңімпаз атанса, Өзбекстан екінші орын иеленді.
Оқ атудан және семсерлесуден командалық медаль
Қазақстан әйелдер құрамасы оқ атудан винтовкамен үш позицияда ату бойынша қола медаль жеңіп алды. Арина Малиновская, София Шульженко және Елизавета Безрукова 50 метр қашықтықтағы командалық финалда 1754 ұпай жинады.
Алтын медальді Қытай құрамасы, күмісті Үндістан командасы иеленді. Малиновская жеке сайыстың финалына да қатысып, алтыншы орын алды.
Қазақстанға күннің бесінші медалін қылыштасудан ерлер құрамасы әкелді. Назарбай Саттархан, Артём Саркисян, Қуаныш Ерғашбай және Нұрмұхаммед Жайлыбай командалық турнирдің ширек финалында Қытай құрамасын 45:40 есебімен жеңді.
Жартылай финалда қазақстандықтар Жапонияға 34:45 есебімен есе жіберіп, қола медаль иеленді. Артём Саркисян үшін бұл 2026 жылғы Азия ойындарындағы екінші жүлде. Бұған дейін ол жеке сайыста қола медаль жеңіп алған еді.
Осылайша, жеті жарыс күнінің қорытындысы бойынша Қазақстан құрамасының қоржынында 35 медаль бар: сегіз алтын, сегіз күміс және 19 қола. Жалпы командалық есепте Қазақстан бесінші орында тұр.
