Махачев Шавкат Рахмоновпен ықтимал жекпе-жек туралы пікір білдірді
Ресейлік файтер Ислам Махачев жеңіліп көрмеген қазақстандық Шавкат Рахмоновпен ықтимал жекпе-жек туралы сұраққа жауап берді, деп хабарлайды Sports24.kz.
35 жастағы UFC чемпионы самбодан әлем чемпионаты өтіп жатқан Ташкентке барды. Журналистермен әңгіме барысында одан Рахмонов 2027 жылдың соңында октагонға оралса, онымен кездесуге дайын ба, әлде сол уақытқа дейін Махачев мансабын аяқтап қоя ма деген сұрақ қойылды.
Ресейлік спортшы қазақстандықтың оралуын күтпейтінін айтты, себебі қазір оның UFC рейтингіндегі жағдайы өзгерген.
«Меніңше, оның оралуын күту дұрыс емес. Оның қашан оралатынын білмеймін. UFC оны рейтингтен алып тастады, ол топ-15 қатарында жоқ, қазір оны үміткерлердің бірі ретінде қарастырып отырған жоқ. Қазіргі таңда бізде екі үміткер бар, уақытша титул солардың арасында сарапқа салынады. Содан кейін келесі үміткердің кім болатынын білеміз. Шавкат жарақаттарының бәрін тезірек емдеп, рейтингке қайта оралады деп үміттенемін», - деді Махачев.
Шавкат Рахмоновтың оралуы туралы не белгілі?
Қазақстандық файтер 2024 жылдың желтоқсан айынан бері октагонға шыққан жоқ. Соңғы жекпе-жегінде ол ирландиялық Иэн Гэрриді төрешілердің бірауызды шешімімен жеңді.
Қазіргі уақытта Рахмонов жарақатынан кейін қалпына келуін жалғастырып жатыр. Оның жаттықтырушысы Эдуард Базровтың айтуынша, қазақстандықтың UFC-дегі оралуы 2027 жылдың басында күтіледі.
Махачевтің кәсіби аралас жекпе-жектегі рекорды — 29 жеңіс және бір жеңіліс.
