Қожахан Асылқұловты сенсациялық жеңіп, Қазақстан чемпионы атанды
Әділбек Қожахан бокстан ересектер арасындағы Қазақстан чемпионатының жеңімпазы атанды. 60 келіге дейінгі салмақ дәрежесінің финалында ол Бибарыс Жексенмен кездесті, деп хабарлайды Sports24.kz.
Алғашқы раундта басымдық Жексеннің жағында болды - 4:1. Алайда кейін Қожахан жекпе-жестің барысын өзгертіп, қорытынды жеңіске қол жеткізді. Төрешілер бірауыздан Әділбекке басымдық берді - 5:0. Осылайша, ол мансабында алғаш рет ересектер арасында Қазақстан чемпионы атанды.
Бұған дейін Қожахан жартылай финалда IBA нұсқасы бойынша әлем чемпионы Оразбек Асылқұловты сенсациялық түрде жеңіп, финалға жолдама алған еді.
Шешуші жекпе-жекке дейін ол 1/8 финалда Асылжан Серікбайдан, ал ширек финалда 2024 жылғы Қазақстан чемпионы Талғат Сырымбетовтен басым түсті.
Бұған дейін ұлттық чемпионаттың финалында үш дүркін әлем чемпионы Назым Қызайбай сенсациялық түрде Элина Базароваға жеңіліп қалды.
