Головкин Роналдуға ұлттық құрамадан кеткеннен кейін қолдау білдірді. Спорт аңыздарын не байланыстырады?
Қазақстандық боксшы Геннадий Головкин Криштиану Роналдудың Португалия құрамасындағы мансабын аяқтау туралы шешімінен кейін оған қолдау білдірді, деп хабарлайды Sports24.kz.
Әлемнің бұрынғы чемпионы футболшының әлеуметтік желідегі қоштасу жазбасының астына пікір қалдырды.
«Нағыз аңыз! Бүкіл әлемдегі адамдарға шабыт сыйлауды жалғастыра бер. Сенің мұраң мәңгі жасайды!» – деп жазды Головкин.
Головкин мен Роналду қалай танысты?
Қазақстандық боксшы мен португалиялық футболшыны көпжылдық таныстық байланыстырады. 2019 жылдың желтоқсанында олар Роналду Италияның «Ювентус» клубында өнер көрсетіп жүрген кезде Туринде кездескен.
Спортшылар DAZN платформасына арналған «Параллель әлемдер» атты деректі жобаға бірге қатысты. Түсірілім барысында Головкин футболшыны бокстың негізгі қырларымен таныстырып, оған арнайы жаттығу өткізді. Сондай-ақ олар кәсіби спорттағы жетістікке жетудің құпияларымен бөлісті.
2025 жылдың желтоқсанында Головкин мен Роналду Сауд Арабиясында қайта кездесті. Олардың жүздесуі португалиялық футболшы екі гол соққан «Әл-Наср» командасының матчынан кейін өтті.
Еске салайық, Роналду 2003 жылдан бері Португалия құрамасында өнер көрсетті. Осы уақыт ішінде ол 234 матч өткізіп, 146 гол соқты. Ұлттық команда сапында футболшы 2016 жылғы Еуропа чемпионатында жеңіске жетіп, Ұлттар лигасының екі дүркін чемпионы атанды.
