Конор Макгрегор оралады: Майкл Чендлермен жекпе-жек Ақ үйде өтеді
UFC-дің екі салмақ дәрежесінде бұрынғы чемпионы Конор Макгрегор октагонға қайта оралатынын ресми түрде мәлімдеді.
Оның қарсыласы — америкалық Майкл Чендлер. Екеуі бұған дейін The Ultimate Fighter жобасында бірге қатысқан болатын.
«Иә, мен Майкл Чендлермен жекпе-жекке шығамын. Біз шоу түсірілімінде таныстық, ол жақсы жігіт. Бірақ октагонда мүлдем басқа жағдай күтіп тұр», — деді Макгрегор Fox News телеарнасына берген сұхбатында.
Айқас 2026 жылдың маусым айының соңында ерекше орында — АҚШ-тағы Ақ үй аумағында өтеді. 37 жастағы ирландиялық үшін бұл 2021 жылдың шілдесінен бергі алғашқы жекпе-жек болмақ. Ол кезде Макгрегор UFC 264 турнирінде Дастин Порьеге қарсы шығып, аяғын сындырып, техникалық нокаутпен жеңіліп қалған еді.
Қазіргі таңда Макгрегордың кәсіби мансабында 22 жеңіс пен 6 жеңіліс бар. Оның қайта оралуы ММА тарихындағы ең көп күткен оқиғалардың бірі ретінде аталып отыр.
Сондай-ақ Макгрегор Ирландияны таңғалдырды: UFC жұлдызы президент сайлауынан бас тартты.