Ислам Махачевтің UFC-дегі келесі қарсыласы ресми түрде анықталды
Ресейлік файтер Ислам Махачев келесі жекпе-жегін ирландиялық Иэн Мачадо Гэрриге қарсы өткізеді. Бұл кездесу 16 тамыз күні өтетін UFC 330 турнирінің басты жекпе-жегі болады, деп хабарлайды Sports24.kz.
Махачев соңғы рет 2025 жылдың қараша айында Нью-Йоркте өткен UFC 322 турнирінде октагонға шыққан. Ол австралиялық Джек Делла Маддаленаны төрешілердің бірауызды шешімімен жеңіп, UFC ұйымының жартылай орта салмақтағы чемпионы атанды. Ресейлік спортшының еншісінде 28 жеңіс және бір жеңіліс бар.
Ал Иэн Мачадо Гэрри соңғы жекпе-жегін 2025 жылдың қарашасында UFC Fight Night 265 турнирінде өткізді. Ирландиялық файтер Белал Мұхаммадты төрешілердің бірауызды шешімімен жеңіп, кәсіби мансабындағы 17-жеңісіне қол жеткізді. Оның рекордында бір ғана жеңіліс бар.
Осылайша UFC 330 турнирінің басты кездесуінде жартылай орта салмақтағы чемпион Ислам Махачев пен титулға басты үміткерлердің бірі Иэн Мачадо Гэрри кездеседі.