Гэтжиден жеңілгеннен кейін Илия Топурия ауруханаға жеткізілді
UFC президенті Дана Уайт UFC Freedom 250 турнирінен кейін Илия Топурияның жағдайы туралы мәлімдеме жасады, деп хабарлайды Sports24.kz.
Ұйым басшысының айтуынша, чемпиондық жекпе-жектен кейін грузиялық файтер ауруханаға жеткізілген.
Дана Уайттың сөзінше, дәрігерлер Топурияның көз ұясы сүйегінің сынуы мүмкін деген күдікпен тексеру жүргізіп жатыр. Алайда нақты диагноз медициналық тексерулерден кейін белгілі болады.
Жекпе-жек барысында Топурия ауыр соққылар өткізіп алды. Үшінші раундтан бастап Джастин Гэтжи қарсыласының қорғанысын жиі бұзып, оның бетіне айтарлықтай зақым келтірді. Төртінші раунд аяқталғаннан кейін Топурияның бапкерлері спортшыны жекпе-жектен алып кету туралы шешім қабылдады.
Еске салсақ, UFC Freedom 250 турнирінің басты жекпе-жегінде Джастин Гэтжи Илия Топурияны техникалық нокаутпен жеңіп, UFC-дің жеңіл салмақтағы жаңа чемпионы атанды. Бұл Топурияның кәсіби мансабындағы алғашқы жеңіліс болды.