Бекзат Алмахан жаңа промоушендегі америкалық файтермен жекпе-жектен бас тартты
Қазақстандық аралас жекпе-жек шебері Бекзат Алмахан грузиялық RKENA промоушенінің турнирінде америкалық Абдул Камараға қарсы жекпе-жекке шықпайды, деп хабарлайды Sports24.kz.
Ұйымның баспасөз қызметі жекпе-жектің өтпейтінін мәлімдеді. Бұған қазақстандық спортшының денсаулығына қатысты мәселелер себеп болған. Оның кардағы орнын отандасы Бахтияр Несіпбек басады.
Бастапқыда Несіпбек турнирдің алдын ала кардында ирандық файтер Сейед Али Аслыға қарсы шығуы керек еді. Енді ол жекпе-жекке алмастырушы ретінде шығып, Камарамен кездеседі.
Айта кетейік, RKENA турнирді америкалық Professional Fighters League (PFL) промоушенімен бірлесіп ұйымдастырады.
Бұған дейін Алмахан UFC-де өнер көрсетіп, төрт жекпе-жек өткізіп, бір жеңіске жетті және үш рет жеңілді. Оның қарсыластарының арасында Умар Нурмагомедов пен Александр Топурия да болды. Қазақстандық файтер екеуіне де төрешілердің бірауызды шешімімен жол берді.
Оның UFC-дегі өнеріндегі ең жарқын сәт канадалық Брэд Катонаға қарсы жекпе-жек болды. Алмахан қарсыласын бірінші раундта нокаутқа түсіріп, кездесуді басталғаннан кейін 63 секундта аяқтады. Бұл финиш UFC тарихындағы қазақстандық файтерлер арасындағы ең жылдам нокаут болды.
