Азиада чемпионы ММА-дағы тарихи триумфы туралы мәлімдеме жасады
2026 жылғы Азия ойындарының 77 келіге дейінгі салмақтағы ММА чемпионы Еркинғали Буркуталин Жапониядағы жеңісі туралы пікір білдірді, деп хабарлайды Sports24.kz.
«Мені қолдаған барша жанға шын жүрегіммен алғыс айтамын. Еңбегімнің зая кетпегеніне өте қуаныштымын. Шынымды айтсам, Азия ойындарының жеңімпазы бола аламын деп өзім де ойлаған жоқпын. Бала кезімізде бокс үйірмесіне қатысатын барлық ұл балалар Олимпиада чемпионы болуды армандайды. Олимпиада ойындарында жеңімпаз атана алмасам да, Азия ойындарында жеңіске жеткеніме өте қуаныштымын.
Әрине, жекпе-жек алдында арнайы тактика әзірледік. Бахрейн спортшысының бұған дейінгі жекпе-жектерін көрдік. Мен сәтті қорғануға және қарсыласыма жекпе-жекті күреске ауыстыруға мүмкіндік бермеуге тырыстым.
Бұл күрес емес, аралас жекпе-жек. Сондықтан өзімнің мықты тұстарымды барынша пайдалануға тырыстым. Мен қазақ халқының табиғатынан боксқа бейімі бар екенін айтқан едім. Мұны дәлелдей алдым деп ойлаймын», — деп Буркуталиннің сөзін Sports.kz келтіреді.
Еске салайық, Буркуталин финалдық жекпе-жекте Бахрейн өкілі Мұхаммад Набиевпен кездесті. Нәтижесінде төрешілер жеңісті бірауыздан Буркуталинге — 3:0 берді. Осылайша, қазақстандық Азия ойындарындағы ММА жарыстарында Қазақстан тарихындағы алғашқы алтын медальді жеңіп алды.
