Ғажайып жағдайда аман қалды: UFC чемпионы жоғары жылдамдықтағы қорқынышты жол апатына ұшырады
Америкалық аралас жекпе-жек шебері Шон Стрикленд аса қауіпті жол апатынан кейін өлім аузынан аман қалды, деп хабарлайды Sports24.kz.
UFC-нің орта салмақтағы қазіргі чемпионы көліктің жолаушы орнында отырған кезде ауыр жол апатына түскен. «Тарзан» лақап атымен танымал 35 жастағы жауынгер көлікті басқаруды досына сеніп тапсырғанын айтты. Сағатына шамамен 60 миль (шамамен 96 км/сағ) жылдамдықпен келе жатқан көлік жолдан шығып кетіп, алты рет аударылған. Апат кезінде дулығасы мен қорғаныс жабдықтары болмаған спортшы басын жерге қатты соғып алған.
- Сондай-ақ оқыңыз: Асу Алмабаев UFC титулына үміткерлік жекпе-жек туралы айтып берді
Жарияланған видеода Стрикленд басында, иығында және арқасында пайда болған көптеген сырылған жерлер мен көгерген іздерді көрсетті. Ол өзін күйзелісте әрі шок жағдайында сезініп жүргенін мойындады. Жауынгердің айтуынша, қатты соққыдан кейін екеуі де біраз уақыт ес-түссіз жатқан. Стриклендтің досы жарақаттарымен ауруханаға жеткізілді, ал Шон үйде қалуды шешіп, жоғары жылдамдықпен дулығасыз жүргені үшін өзін ақымақ деп атады.
Айта кетейік, бұл оқиға жанкүйерлер арасында үлкен алаңдаушылық туғызды. Олар 2018 жылдың желтоқсанында болған мотоцикл апатын еске алды. Сол жол апатынан кейін Стриклендке тізесіне күрделі операция жасалып, спортшы екі жыл бойы жекпе-жектерден шет қалған еді. Қазіргі таңда америкалық спортшының кәсіби рекорды — 31 жеңіс және 7 жеңіліс. Ал Нассурдин Имавовқа қарсы титулын қорғау жекпе-жегі желтоқсанда өтетін UFC 335 турниріне жоспарланған.
