Асу Алмабаев Қазақстандағы алғашқы UFC турнирін басқаруға дайын екенін мәлімдеді
UFC-де өнер көрсететін қазақстандық файтер Асу Алмабаев ұйымның Қазақстанда алғашқы турнирін өткізу мүмкіндігі туралы пікір білдіріп, кештің басты жекпе-жегін басқару перспективасын бағалады, деп хабарлайды Sports24.kz.
Алмабаевтың келесі жекпе-жегі алдындағы баспасөз мәслихатында одан UFC өкілдерінің Қазақстанға келгенін естіген-естімегені және алдағы турнирдің басты жекпе-жегіне қатысу туралы ұсыныс түскен-түспегені сұралды.
«Әзірге ешқандай ақпарат білмеймін. Бұл — жай ғана қауесет. Нақты күні мен оның қай жерде, қашан, қай қалада өтетінін естіген жоқпын. Қазір ең бастысы — жекпе-жегіме дайындалып, жеңіске жету, содан кейін көре жатармыз. Егер Қазақстанда осы турнирдің басты жекпе-жегіне қатысу мүмкіндігі болса, мен үшін керемет болар еді», — деп жауап берді Алмабаев.
Еске салайық, Асу Алмабаев пен Кёджи Хоригути арасындағы жекпе-жек 21 қарашада Қатардың Доха қаласында UFC Fight Night 294 турнирінің негізгі кардында өтеді. Бұл қазақстандық үшін жеңіл салмақтағы титулдық жарыстағы орнын нығайтуға мүмкіндік.
2023 жылғы тамызда UFC-дегі дебютінен бері Алмабаев сегіз жекпе-жек өткізіп, оның жетеуінде жеңіске жетті. Қазір оның қатарынан жеңген жекпе-жектерінің саны — үш.
Бұған дейін Қазақстанның туризм және спорт министрі Ербол Мырзабосынов UFC-мен елде турнир өткізу жөніндегі келіссөздер жалғасып жатқанын хабарлаған еді. Оның айтуынша, іс-шараны 2027 немесе 2028 жылы өткізу қарастырылып жатыр, ал талқылау қорытындысын қараша айының соңына дейін жариялау жоспарланған.