Кравец «Локомотивті» ойсырата жеңудің негізгі тұстарын атады
«Барыс» бас бапкері Михаил Кравец ҚХЛ тұрақты чемпионатының сырт алаңдағы матчында ярославльдік «Локомотивті» 5:0 есебімен ойсырата жеңгеннен кейін пікір білдірді, деп хабарлайды Sports24.kz.
Астаналық команда тұрақты чемпионаттың Батыс конференциясы көшбасшысын «құрғақ» есеппен 5:0 есебімен жеңді.
«Біз бұл ойынға дайындалдық. Кіммен ойнайтынымыз сөзсіз-ақ түсінікті болды, сондықтан бұл жерде 200 пайызға күш салып, қолымыздан келгеннің бәрін жасауымыз керек еді.
Жігіттер ойын тапсырмасын толық орындады деп есептеймін. Ойын тәртібі жақсы болды, бәрін дұрыс жасадық. Шайбаға өзімізді көп рет тосып, айып минуттарынсыз дерлік ойнадық. Қақпашы да қолдау көрсетті, талай рет құтқарып қалды. Әрі жақсы голдар соқтық деп ойлаймын.
Яғни, әрі шыдадық, әрі қарсыласқа дер кезінде жауап бердік. Біздің тарапымыздан командалық ойын өте жақсы болды, алаңда команданы көруге болатын еді. Бұл маңызды. Әр ойында осылай ойнауымыз керек. Жігіттерге тамаша ойын үшін алғыс айтып, жанкүйерлерімізді жеңіспен құттықтағым келеді. Алда бізді «Динамомен» қиын ойын күтіп тұр.
Меніңше, әр кезең шешуші болды. Қарсылас қысымды күшейтті, біз жауап бердік, тағы да қысымды арттырды — біз қайта жауап бердік. Әрине, бірінші болып гол соққанымыз командамыз үшін өте маңызды. Көбіне гол жіберіп алсақ, бұл есеңгіреуден шығу бізге қиын болады. Ал гол соққан кезде команда қарқынын арттырады. Сондықтан бұл өте маңызды.
Бәлкім, Джастин Беллидің шайбаға тосқауыл қоюынан кейін соғылған үшінші гол және қақпа сыртынан салынған төртінші гол шешуші болды. Жалпы, барлық гол жақсы әрі дер кезінде соғылды.
Ең бастысы, голдар біздің қорғаныста сауатты ойнағанымыздың арқасында соғылды. Қақпашы құтқарды, шайбаға өзімізді тосып отырдық. Екінші кезеңде, әдеттегідей, «Локомотив» бізді қысып тастады, бірақ периметр бойында ойнап, еш жерде қателік жібермедік. Ал қателік кеткен тұстарда қақпашы құтқарып отырды», – деп бапкердің сөзін shaiba.kz келтіреді.
Бүгінгі жеңістен кейін астаналық команданың еншісінде сегіз ұпай бар. «Барыс» ҚХЛ Шығыс конференциясының турнир кестесінде бесінші орында тұр.
Астанаға оралмас бұрын сырт алаңдағы сериясын «Барыс» 22 қыркүйекте Мәскеуде «Динамоға» қарсы матчпен аяқтайды.
