Өз буынының кумирі, бірақ «Алтын допты» жеңбеген: Тьерри Анридің мансабындағы үздік голдар
Тьерри Анри — қазіргі футболдың ұлы шабуылшыларының бірі, бірақ ол ешқашан «Алтын допқа» қол жеткізе алмады.
Соған қарамастан, француз шабуылшысы әлемнің түкпір-түкпіріндегі миллиондаған жанкүйерлердің жүрегін жаулап, «Арсеналды» жаһандағы ең танымал клубтардың біріне айналдырды.
Анридің 49 жасқа толуымен байланысты, Sports24.kz француз бомбардирі мен Франция құрамасының аңызының басты жетістіктерін және оның ең үздік голдарын еске түсіруді ұсынады.
Тьерри Анридің негізгі жетістіктері
Аңыз шабуылшы 1998 жылғы әлем чемпионатында және 2000 жылғы Еуропа чемпионатында Франция құрамасымен бірге жеңіске жеткені үшін мақтана алады. Сонымен қатар, ол Лондондағы «Арсенал» тарихындағы үздік сұрмерген мәртебесін ұзақ уақыт бойы сақтап келеді (228 гол).
Солтүстік Лондон клубымен бірге француз футболшысы Англия чемпионы атағын екі рет (2001/02, 2003/04 — «жеңілмейтіндер» құрамындағы басты қозғаушы күш бола отырып), Англия Кубогының иегері атағын үш мәрте (2001/02, 2002/03, 2004/05) жеңіп алды. Лондонда Тьерриге бағынбаған жалғыз ірі клубтық трофей — Чемпиондар лигасы. Бұл кубокты ол 2009 жылы «Барселона» сапында ұтып алды.
Анри мансабында төрт рет Англия Премьер-лигасының үздік сұрмергені атанды (2001/02, 2003/04, 2004/05, 2005/06). Екі рет «Алтын бутса» иегері болды (2004, 2005), бұл — Еуропа ұлттық лигаларының үздік бомбардиріне берілетін марапат.
Анридің мансабындағы басты голдар
- «Тоттенхэмге» (2002 жылдың қарашасы): іс жүзінде бүкіл алаңды кесіп өтіп, жолай бірнеше қарсыласын қапы қалдырған Анри допты бұрышқа дәл бағыттады. Осыдан кейін ол басты қарсыластың жанкүйерлерінің алдында күлкілі түрде голды атап өтті.
- «Манчестер Юнайтедке» (2000 жылдың қазаны): Әлі күнге дейін «қызыл шайтандардың» жанкүйерлерін түн ұйқысынан оятатын фантастикалық гол. Қақпаға арқасымен тұрған Анри допты тізесіне лақтырып, әуеде бұрылып, Фабьен Бартез қақпасының тоғыздығына дәл соққы жасады.
- «Реал» қақпасына (2006 жылдың ақпаны): Чемпиондар лигасының 1/8 финалындағы жеңіс голы — дәл «Бернабеу» стадионында. Сол маусымда «Арсенал» алғаш рет финалға шығып, қалаған «құлақты» кубокқа барынша жақындады. Анри орталықтан допты алып, Мадрид жұлдыздарының қорғанысын оңай айналып өтіп, стадионды үнсіздікке бөлеп, торға дәл соққы жасады.
- «Чарльтонға» (2004 жылдың қазаны): Әсемдігі мен шеберлігі жағынан қайталанбас өкше соққы. Флангтан келген пасты француз форварды өкшесімен қақпаға енгізіп, өзінің техникасы мен сиқырын паш етті.
- «Лидске» қарсы қайтып оралуы (2012 жылдың қаңтары): Бұл сәт «Арсенал» жанкүйерлерінің ешқайсысын бей-жай қалдырмады. «Эмирейтс» стадионына қайта оралған Анри алаңға шығып, өзінің фирмалық иіліп соққан соққысымен допты алыс бұрышқа дәл бағыттап, стадионды ностальгия мен қуаныштан көз жасына бөледі.
