Соңғы бес әлем чемпионы қанша жүлде ақша тапты?
Әлем чемпионатында жеңіске жету тек кубок пен медаль ғана емес, сонымен қатар жеңімпаз федерацияға арналған қомақты сыйақы. Sports24.kz соңғы бес әлем чемпионатының жеңімпаздары қанша ақша алғанын анықтады.
Италия (2006) — 20 миллион доллар
Италия құрамасы соңғы екі әлем чемпионатына қатыспағанын ескерсек (алдағы Солтүстік Америка турнирі үшінші рет болмақ), оларды бұл тізімде көру расында да әдеттен тыс. Дегенмен, факт — факт.
Германиядағы мундиальге қатысқаны үшін Италия футбол федерациясы жеті миллион доллар алды, ал плей-офф кезеңінен финалға дейін жеткені үшін тағы 11 миллион доллар тапты. Францияны финалда жеңгені үшін Италия құрамасы тағы екі миллион доллар иеленді.
Испания (2010) — 30 миллион доллар
Жүлде қорының айтарлықтай өсуі дәл осы Оңтүстік Африка турнирінің алдында болды. Еуропа чемпионы атанған Испания бұл өсімді алғаш пайдаланған командалардың бірі болып, өз федерациясының қоржынына айтарлықтай қаржы қосты.
Мұнда топтық кезең мен плей-оффқа шыққаны үшін «фурия роха» 12 миллион доллар алды. Финалға шыққаны үшін тағы 11 миллион, ал финалда Нидерландыны жеңгені үшін федерация қоржыны бірден жеті миллион долларға толықты.
Германия (2014) — 35 миллион доллар
Бразилиядағы турнир де чемпионға қомақты сыйақы әкелді, бірақ айтарлықтай артық емес. Испаниямен салыстырғанда Германия құрамасы бес миллион долларға көбірек табыс тапты. Айырмашылықтың негізгі бөлігі — финалда Аргентинаны жеңуі: дәл осы жерде «бундестим» бірден он миллион доллар иеленді.
Франция (2018) — 38 миллион доллар
Ресейдегі әлем чемпионатында да жеңімпаз алдыңғы чемпионнан артық табыс тапқан жоқ. Айырмашылық бар болғаны үш миллион доллар — бұл финал жеңімпазы болған Францияға берілген сыйақыдағы айырмашылық.
Аргентина (2022) — 42 миллион доллар
Лионель Месси мен оның командасы үшін жүлде қоры төрт миллион долларға өсті, бұл — жалпы чемпион сыйақысының көбеюімен қатар, Аргентина мұндай нәтижеге жеткені үшін қатысу бонусын да бір миллион долларға артығымен алды.
? (2026) — 50 миллион доллар
2026 жылғы әлем чемпионы кім болатынын әзірге ешкім білмейді. Бірақ бір нәрсе анық: жаңа чемпион рекордтық сыйақы алады. Себебі финалда жеңіске жеткен команда бірден 25 миллион доллар алады. Ал қатысу бонусы да бұрын-соңды болмаған — 12,5 миллион доллар.
