ҚПЛ клубының стадионы еуропалық рейтингтің топ-15 тізіміне кірді
«Елімай» стадионы еурокубоктардың биылғы маусымындағы матчтарға жанкүйерлердің толу пайызы бойынша ареналардың топ-15 тізіміне кірді, деп хабарлайды Sports24.kz.
Семейде өткен жалғыз еурокубок матчына, яғни Конференциялар лигасының бірінші іріктеу кезеңіндегі «Алашкертке» қарсы кездесуге 7900 жанкүйер келді. Бұл стадионның 90,8%-ға толғанын білдіреді.
- Сондай-ақ оқыңыз: «Қайрат» пен «Астана» жағымсыз еуропалық рейтингтің ондығына кірді
Бұл көрсеткіш бойынша «Елімай» 2026/2027 маусымындағы барлық еурокубоктардың іріктеу кезеңі қорытындысында ареналар арасында 15-орынға жайғасты. «Қайрат» — төрт матчтағы орташа 74% толымдылық көрсеткішімен 47-орында, «Тобыл» — литвалық «Паневежис» пен сербиялық «Партизанға» қарсы екі матчтағы 63,0% көрсеткішімен 70-орында, ал «Астана» албаниялық «Динамо Ситиге» қарсы бір матчтың қорытындысы бойынша екінші жүздіктен орын алды — 102-орын (50,5%).
Еске салайық, «Қайраттың» көрсеткіші әлі де өзгеруі мүмкін, себебі алматылық клуб — еурокубоктардың негізгі кезеңінде Қазақстан футболының жалғыз өкілі.
