«Оқжетпес» «Ордабасыны» жеңгені үшін қомақты сыйақы алады: футболшылар қанша табыс тапты?
Қазақстан Премьер-лигасының 25-турында «Ордабасыны» жеңген «Оқжетпес» футболшылары қомақты сыйақы алады. Жалпы төлем көлемі 24 миллион теңгені құрайды, деп хабарлайды Sports24.kz.
Бұл қаражаттың басым бөлігі командалық нәтижеге беріледі. Жеңіс үшін футболшыларға 20 миллион теңге төленеді. Тағы төрт миллион теңге кездесуде ерекше көзге түскен ойыншыларға үлестіріледі.
Гол авторлары Нұрғайни Бөрібаев пен Леонардо Де Ассунсао екі миллион теңгеден алады. Сондай-ақ қақпада сенімді ойын көрсеткен Мирослав Лобанцевке екі миллион теңге көлемінде жеке сыйақы қарастырылған.
Осылайша, бір жеңіс үшін клуб футболшыларға жалпы 24 миллион теңге сыйақы төлейді.
Кездесудің өзі «Оқжетпестің» 2:1 есебіндегі жеңісімен аяқталды. Көкшетаулықтар бірінші болып гол жіберіп алғанымен, ойын барысын өзгертіп, чемпионат көшбасшысын ерік-жігердің арқасында жеңе білді.
Бұл жеңіліс «Ордабасының» төрт матчқа созылған жеңісті сериясын тоқтатты. Соған қарамастан, шымкенттік клуб 55 ұпаймен турнир кестесіндегі көшбасшылығын сақтап қалды.
Ал «Оқжетпес» жеңістен кейін 42 ұпай жинап, үшінші орын үшін таласта «Астанамен» теңесті. Көкшетаулық клуб үшін бұл маусымдағы ең елеулі нәтижелердің бірі болды: команда чемпионат көшбасшысын жеңіп қана қоймай, қомақты сыйақыға да ие болды.
