Opta суперкомпьютері әлем чемпионатының басты фаворитін атады
Opta статистикалық порталы футболдан әлем чемпионаты басталмас бір күн бұрын 2026 жылғы мундиальдің нәтижесін болжау үшін өз суперкомпьютерін іске қосты, деп хабарлайды Sports24.kz.
Opta-ның соңғы математикалық есептеулері бойынша, Испания құрамасының беделді трофейді иелену мүмкіндігі ең жоғары — сарапшылар «Фурия Роханың» жеңіске жету ықтималдығын 16% деп бағалайды.
Франция мен Англия үздік үштікте
Бұл рейтингте Испанияның басты қарсыластары Франция – 12,9% ықтималдықпен екінші орында, ал Англия 10,8% нәтижемен үздік үштікті түйіндейді.
Аргентина мен Бразилия үздік үштіктен тыс қалды
Жасанды интеллект үздік 20 команданың тек жалпы жеңіске емес, плей-оффтың негізгі кезеңдеріне өту мүмкіндігін де саралады. Қазіргі әлем чемпиондары Аргентина 10,1% нәтижемен төртінші орынға тұрақтады, ал Португалия (7,1%) алғашқы бестікте Бразилияны (6,6%) басып озды. Үздік жиырмалықтың ішінде суперкомпьютер Мексикаға ең төменгі жеңіс мүмкіндігін берді — бар болғаны 0,9%.
Айта кетейік, 2026 жылғы әлем чемпионаты Қазақстан уақыты бойынша 11-нен 12 маусымға қараған түні, сағат 00:00-де басталады. Ашылу матчында Мексика мен Оңтүстік Африка кездеседі.
