Молдова құрамасының бас бапкері Қазақстанның жетекші ойыншыларын атады: олардың арасында Сәтпаев бар ма?
Молдова ұлттық құрамасының бас бапкері Лилиан Попеску УЕФА Ұлттар лигасының бесінші турында Қазақстанға қарсы өз алаңында өтетін матчқа қатысты пікір білдірді. Маман қарсыластың шабуыл шебіндегі өзгерістерге назар аударып, Исламбек Қуаттың қайта оралуын атап өтті. Сондай-ақ алдағы кездесуде футболшылардың психологиялық дайындығы шешуші рөл атқаруы мүмкін екенін жеткізді, деп хабарлайды Sports24.kz.
Попескудің айтуынша, Қазақстан құрамасының құрамы Астанада өткен алдыңғы кездесумен салыстырғанда айтарлықтай өзгерген. Әсіресе, ол шабуылда маңызды рөл атқаруы мүмкін Максим Самородов пен Ислам Чесноковты ерекше атап өтті.
«Қазақстан құрамасының қазіргі құрамын Астанада бізге қарсы ойнаған футболшылармен салыстырсақ, бірқатар өзгерісті байқауға болады. Шабуыл шебіне Чесноков пен Самородов қосылды. Меніңше, екеуінің де алғашқы минуттардан алаңға шығу мүмкіндігі жоғары. Сонымен қатар өткен матчта сары қағаздарының көптігіне байланысты ойнай алмаған Қуат та қайта оралды», – деді Попеску.
Айта кетейік, молдовалық маман Қазақстан құрамасының бірнеше футболшысын атап өткенімен, Дастан Сәтпаев туралы пікір білдірген жоқ.
Алаң иелерінің бас бапкері алдағы кездесудің оңай болмайтынын да жасырмады. Оның сөзінше, турнирдегі жағдайға қарамастан, Молдова құрамасы әр матчқа бірдей жауапкершілікпен қарайды. Бұл жолы да нәтиже үшін күрес ерекше маңызды болмақ.
«Бізді тартысты әрі жауапкершілігі жоғары кездесу күтіп тұр. Дегенмен біз үшін әр ойынның маңызы зор. Жолдастық матч болсын, Ұлттар лигасы аясындағы бәсеке болсын, басты мақсатымыз – жақсы нәтижеге қол жеткізу. Футболшыларымның ұйымшылдық танытып, тәртіпті сақтай отырып, шабуылда батыл әрекет еткенін қалаймын. Бірақ ең маңыздысы – психологиялық дайындық. Ойыншылар алаңға жеңіліп қаламыз деген қорқынышпен шықпауы керек. Бапкерлер штабының міндеті – артық қысымды азайтып, олардың өз күшіне сенуіне көмектесу. Сонда ғана бар мүмкіндігімізді көрсетіп, көздеген нәтижеге жете аламыз», – деп түсіндірді бас бапкер.
Молдова мен Қазақстан құрамалары арасындағы Ұлттар лигасының бесінші турындағы матч 13 қарашада Кишинев қаласындағы «Зимбру» стадионында өтеді. Кездесу Қазақстан уақытымен сағат 22:00-де басталады.
Бұған дейін Sports24.kz алдағы матчқа талдау жасап, екі құраманың өзара кездесулер тарихына тоқталған болатын. Статистикалық көрсеткіштер Қазақстан құрамасының пайдасына шешілмей отыр. Бұл жағдай сырт алаңдағы алдағы бәсекенің маңызын арттыра түседі.
