Майамидегі тартысты тең ойын: «Реал» мен «Әл-Хиләл» клубтар арасындағы әлем чемпионатын тең нәтижемен бастады
18-інен 19 маусымға қараған түні Майами қаласындағы әйгілі «Хард Рок» аренасында клубтар арасындағы әлем чемпионаты-2025 турнирінің H тобы аясындағы алғашқы тур ойыны өтті. Күннің орталық кездесуі саналатын матчта мадридтік «Реал» саудиялық «Әл-Хиләлді» жеңе алмады – есеп 1:1.
Хаби Алонсоның шәкірттері ойын басталған сәттен-ақ белсенді қимылдап, 34-минутта есеп ашты. Жас шабуылшы Гонсало Гарсия мадридтіктер тарихындағы клубтық әлем чемпионатындағы алғашқы голдың авторы атанды. Алайда испаниялық клубтың қуанышы ұзаққа созылмады – арада жеті минут өткен соң «Әл-Хиләл» 11 метрлік пенальтиден есепті теңестіріп, қарымта қайтарды. Гол авторы – Рубен Невеш.
Екінші таймда «Реал» тағы да басымдықты өз қолына алуға тырысты. Матч соңында Федерико Вальверде жеңісті жұлып алуға мүмкіндік алды, бірақ пенальтиден мүлт кетті.
Клубтар арасындағы әлем чемпионаты-2025. H тобы. 1-тур
«Реал» (Испания) — «Әл-Хиләл» (Сауд Арабиясы) — 1:1
Голдар: Гонсало Гарсия, 34 — Невеш, 41 (пен.)
Келесі турда, 23 маусым күні, «Реал» Мексиканың «Пачука» клубымен кездессе, «Әл-Хиләл» Австрияның «Ред Булл Зальцбург» командасымен ойнайды.
