Криштиану Роналдудың клубы жаңа иеге өтуі мүмкін
«Әл-Наср» Сауд Арабиясы футболы тарихындағы ең ауқымды өзгерістердің бірі орын алатын клубқа айналуы мүмкін, деп хабарлайды Sports24.kz.
Semafor мәліметінше, Сауд Арабиясының Мемлекеттік инвестициялық қоры «Әл-Насрдың» шамамен 800 миллион риал, яғни 213 миллион доллар көлеміндегі қарызын өтеу бойынша жұмыс істеп жатыр. Жоспар қор портфеліндегі компаниялармен демеушілік келісімдер жасауды көздейді және ықтимал сатылым алдында клубтың қаржылық балансын нығайтуға бағытталған.
Есепте RedBird Capital Partners компаниясы мен оның серіктестері «Әл-Насрдың» 70 пайыз акциясын сатып алу мүмкіндігіне қатысты PIF-пен кемінде екі кездесу өткізгені айтылған. Ықтимал инвесторлар бұл үлес үшін шамамен 1 миллиард риал, яғни 267 миллион доллар төлеуі мүмкін.
Алайда келіссөздер әзірге бастапқы кезеңде. Қорға жақын дереккөз RedBird тарапынан қызығушылықтың алдын ала сипатта екенін атап өтті: түпкілікті шарттар әлі келісілген жоқ және мәміленің соңында жүзеге асатынына кепілдік жоқ.
Криштиану Роналду командадағы басты жұлдыз ғана болып қалмауы мүмкін. Егер мәміле жасалса, португалиялық шабуылшы «Әл-Насрдың» 20 пайыз акциясына ие болады деп күтілуде. Ықтимал инвесторлар қатарында Saudi Media Company компаниясы да аталған, дегенмен меншіктің түпкілікті құрылымы әлі өзгеруі мүмкін.
RedBird қазірдің өзінде еуропалық футболдағы ірі ойыншылардың бірі саналады: компания «Милан» клубының иесі. Айта кетейік, ресми лига деректеріне сәйкес, «Әл-Наср» сегіз матчтан кейін алты жеңіспен Сауд Арабиясының Кәсіби лигасында үшінші орында тұр.
