«Кейнге үш күн ғана қалды»: Ямальдың ағасы «Алтын доп» иегерін қатаң сынға алды
«Барселона» мен Испания құрамасының шабуылшысы Ламин Ямальдың ағасы Абдул Абделлауи Мюнхеннің «Бавариясы» форварды Гарри Кейннің 2026 жылғы «Алтын доп» үшін дауыс беруде жеңіске жетуіне қатты наразылық білдірді, деп хабарлайды Sports24.kz.
26 қазанда Лондонда өткен беделді жүлдені табыстау рәсімінде Кейн бірінші орын алды. Екінші орынға мадридтік «Реалдың» шабуылшысы Килиан Мбаппе жайғасса, үздік үштікті Ямаль түйіндеді.
Дауыс беру нәтижесі 19 жастағы испандықтың айналасындағылардың наразылығын туғызды.
Cadena SER радиосының эфирінде Абделлауи әлем футболындағы басты жеке жүлдеге дәл оның жиені лайық болғанын айтты.
«Егер футболды жақсы көрсең, Гарри Кейнді емес, Ламинді көруге барасың. Кейн — гол соғушы, ал Ламин — әлемдегі ең үздік футболшы», — деді ойыншының туысы.
Абделлауи ағылшын шабуылшысының жасына қатысты ерекше өткір пікір білдіріп, ұйымдастырушылардың оған мансабының аяқталуға жақын қалғанына байланысты басымдық бергенін топшылады.
«Барлығы Ламиннің әлі жас екенін, оның 19 жаста екенін және жүлдені жеңіп алуға уақыты барын айтады. Ал Кейнге ойнауға небәрі үш күн қалды, сондықтан оған „Алтын допты“ сыйлады», — деп қосты ол.
Ямальдың ағасы испандықтың әлем чемпионатын, Ла Лиганы және Испания Суперкубогын жеңіп алғанын да еске салды. Оның пікірінше, жиені тамаша маусым өткізіп, тек нәтижелілігін ғана емес, серіктестеріне гол соғатын сәттер жасап беру қабілетін де көрсетті.
Бұдан бөлек, Абделлауи болашақта Ямаль «Алтын допты» бес рет жеңіп алатынына сенім білдірді.
Еске салайық, Кейн клубы мен ұлттық құрама сапында 65 матчта 73 гол соққан маусымнан кейін жүлдеге ие болды. Ағылшын футболшысы сондай-ақ Германия чемпионы атанып, ел кубогын жеңіп алды және 2026 жылғы әлем чемпионатының қола жүлдегері болды.
Негізгі дауыс беруде үшінші орын алғанына қарамастан, Ямаль үздік жас футболшыға табысталатын Копа жүлдесін қатарынан үшінші рет иеленді.
