Гиннестің рекордтар кітабы Холланды төрт мәрте марапаттады
«Манчестер Сити» шабуылшысы Эрлинг Холланд бірден төрт Гиннестің рекордтар кітабы сертификатын иеленді, деп хабарлайды Sports24.kz.
Ағылшын Премьер-лигасының жаңа маусымы алдында норвегиялық форвардқа марапаттар «Этихад» стадионында табысталды.
Эрлинг Холландтың рекордтары
Қазіргі футболдың ең нәтижелі шабуылшыларының бірі бірнеше жетістігін ресми түрде растады.
2025 жылдың 2 желтоқсанында Холланд Премьер-лигадағы «Фулхэмге» қарсы ойында гол салып, турнир тарихында 111 матчта 100 голға алғаш болып жеткен ойыншы атанды. Норвегиялық футболшы бұл көрсеткішке жету жылдамдығы бойынша бұрынғы рекордты жаңартты.
Англиядағы дебюттік маусымында Холланд 38 матчтық маусым форматындағы Премьер-лигадағы нәтижелілік рекордын орнатты. 2022/23 жылғы чемпионатта ол 36 гол соқты. Бұған дейінгі рекорд Мохаммед Салахқа тиесілі еді — ол 2017/18 маусымында 32 голмен дараланған. Сонымен қатар, Энди Коул және Алан Ширер 34 голдан соққан, алайда олардың жетістіктері 42 матчтық маусымда тіркелген.
Тағы бір рекордты Холланд Норвегия құрамасында жаңартты. 2020 жылғы 4 қыркүйектен 2024 жылғы 17 қарашаға дейінгі аралықта ол УЕФА Ұлттар лигасында 19 гол соғып, турнир тарихындағы үздік нәтижеге қол жеткізді. Ең жақын ізбасары — Криштиану Роналду, оның еншісінде төрт голға кем.
Төртінші сертификат Чемпиондар лигасымен байланысты. 2023 жылдың 14 наурызында 1/8 финалдағы «РБ Лейпцигке» қарсы ойында Холланд бес гол соқты. Осылайша, ол турнир тарихында бір матчта бір футболшының соққан гол саны бойынша рекордты қайталады. Бұған дейін бұл жетістік Лионель Месси мен Луис Адрианода болған.
