ФОТО: «Ливерпуль» «Энфилдте» Юрген Клопптың мүсінін ашты
«Энфилд» стадионының музейінде «Ливерпульдің» бұрынғы бапкері Юрген Клопптың қола мүсінін салтанатты түрде ашу рәсімі өтті. Мүсін оның команда тарихына қосқан өлшеусіз үлесіне арналды, деп хабарлайды Sports24.kz.
Қола ескерткіш енді «қызылдар» тарихындағы ұлы аңыздардың мүсіндері қойылған экспозицияның орталық бөлігінен орын алды.
Мүсінде неміс бапкерінің көпшілікке етене таныс эмоциясы мен жеңісті қимылы бейнеленген. Оның жарқын философиясы мен сарқылмас энергиясы «Ливерпульдің» еуропалық футболдағы үстем күш ретіндегі мәртебесін қайта қалыптастырды.
«Ливерпуль» басшылығы бұл ескерткіш жеңіске деген менталитетті қайтарып, клубтың жеңісті дәстүрлерін қайта жаңғыртқаны үшін бүкіл жанкүйерлер қауымының шынайы құрметінің белгісі екенін атап өтті.
Айта кетейік, Клопп «Ливерпульді» 2015-2024 жылдар аралығында басқарды. Осы кезеңде ол командамен бірге УЕФА Чемпиондар лигасын, УЕФА Суперкубогын, ФИФА клубтар арасындағы әлем чемпионатын және 2020 жылы көптен күткен Премьер-лига титулын жеңіп алды. Осылайша клубтың чемпиондық атақты 30 жыл күткен сағынышын басты.
