ФИФА директоры құқық дауына байланысты қызметінен босатылды
Халықаралық футбол федерациясының (ФИФА) бас операциялық директоры Кевин Ламур ұйым президенті Джанни Инфантиноны әлем чемпионатының құқықтарының бір бөлігін коммерциялық құрылымдарға сатпақ болғаны үшін сынға алғаннан кейін қызметінен босатылды, деп хабарлайды Sports24.kz.
RMC Sport-тың жазуынша, 2024 жылдың қарашасынан бастап бұл лауазымды атқарған басшы жұмыстан шығарылды, ал ұйым бұл қоштасудың егжей-тегжейін жарияламады. ФИФА кеңес мүшелерін бұл шешім өзара келісіммен қабылданғанын хабарлап, Кевин Ламурға құрмет білдірді.
Бұл шешім қызметкерлер үшін тосын жайт болмады, олар Ламурдың бұқаралық ақпарат құралдарындағы пікірінен кейін осындай нәтижені болжаған еді.
Дау тарихы
Бұған дейін The Times газеті ФИФА басшысы Джанни Инфантино әлем чемпионатының коммерциялық құқықтарының үлесін жеке инвесторларға сатуды жоспарлап отырғанын, бұл схема оған ондаған миллион доллар пайда әкелуі мүмкін екенін хабарлаған еді.
Бұл жоспар бойынша FIFA-ның басты ерлер және әйелдер жарыстарын – әлем чемпионаты мен клубтық әлем чемпионатын бақылайтын компания құру көзделген. Ұйым АҚШ президенті Дональд Трамп әкімшілігіне жақын адамдармен кеңескені де атап көрсетілген.
Кейін УЕФА, АФК және КОНКАКАФ бұл реформаларға бір ауыздан бойкот жариялады. Бұл ұйымдарға мүше елдер өзгерістер қабылданған жағдайда жарыстарды бойкоттайтынын ескертті.
Ақырында, ФИФА бұл жоспардан бас тартқаны белгілі болды.
Дегенмен, дау мұнымен аяқталған жоқ – УЕФА, АФК және КОНКАКАФ ФИФА-ның қызметін тексеруді талап етті.
