Дастан Сәтпаев «Бернлидің» жаңа бапкері тұсында алғашқы матчын қашан өткізуі мүмкін
Англияның «Бернли» клубы Чемпионшиптегі кезекті ойынына дайындалып жатыр. Алайда Дастан Сәтпаевтың алдағы матчқа қатысуы әлі белгісіз. Қазақстандық футболшының бұлшықетіндегі жарақаты қайта сыр беріп, жаттықтырушылар штабы оның қашан алаңға оралатынын нақты айта алмай отыр, деп хабарлайды Sports24.kz.
29 қазанда «Бернли» басшылығы Ники Хайеннің орнына швейцариялық маман Фабио Челестиниді бас бапкер етіп тағайындады. Жаңа жаттықтырушы алғашқы кездесуін 31 қазанда «Портсмутқа» қарсы өткізді. Чемпионшиптің 13-туры аясындағы ойын 0:0 есебімен аяқталды.
Сәтпаев бұл матчтың өтініміне енген жоқ. Кейін Челестини қазақстандық шабуылшының санның артқы бұлшықетін қайта жарақаттағанын растады. Қазір футболшының сауығу барысын «Бернли» мен оның трансферлік құқығына иелік ететін лондондық «Челси» клубтарының медициналық мамандары бірлесіп бақылап отыр.
«Қазір біз «Челсимен» бірлесіп жұмыс істеп жатырмыз. Оның санның артқы бұлшықетінде мәселе бар, яғни бұлшықет жарақаты. Жағдайды бірге бақылап, күн сайынғы өзгерістерге қарай әрекет етуіміз керек. Оның қанша уақыт алаңға шықпайтынын айту өте қиын. Мен мұнда келгеніме небәрі 48 сағат болды. Қолымда көп ақпарат бар, бірақ оның бәрін толық білемін деп айта алмаймын», – деді Челестини. Оның сөзін Burnley Express басылымы келтірді.
Еске салайық, Сәтпаев қыркүйек айының басында «Мидлсброға» қарсы кездесуде алғаш рет жарақат алған еді. Соның салдарынан бір айдан астам уақыт ойнамай, 11 қазанда «Уотфордқа» қарсы матчта қосалқы құрамнан алаңға шықты.
Одан кейін қазақстандық шабуылшы біртіндеп ойын тәжірибесін жинай бастады. Ол «Вулверхэмптонға» қарсы кездесуде де мүмкіндік алды. Ал Ники Хайеннің жетекшілігіндегі соңғы матчта, «Линкольн Ситиге» қарсы ойында негізгі құрамда шығып, шамамен бір сағат өнер көрсетті. Алайда жаңа жарақат оның команда сапына толық оралуына кедергі келтірді.
Сәтпаев Челестинидің жетекшілігімен қашан алаңға шығуы мүмкін?
«Бернли» келесі кездесуін 3 қарашада сырт алаңда лондондық «Куинз Парк Рейнджерске» қарсы өткізеді. Матч Қазақстан уақытымен 4 қараша күні сағат 00:45-те басталады.
Команданың одан кейінгі ойыны 7 қарашаға жоспарланған. Бұл күні «Бернли» «Кардифф Ситимен» кездеседі. Басталуы – Қазақстан уақытымен 20:00.
Ал халықаралық үзілістен кейін клуб 22 қарашада «Блэкберн Роверсті» қабылдайды.
Аталған кездесулердің бірі Сәтпаевтың жаңа бапкер тұсындағы алғашқы матчы болуы мүмкін. Дегенмен оның жақын күндері толық сауығып үлгеретініне әзірге кепілдік жоқ. Алаңға оралу мерзімі футболшының денсаулығына және екі клубтың медициналық мамандары қабылдайтын шешімге байланысты болады.
Айта кетейік, жарақатына байланысты Сәтпаев Қазақстан құрамасының қараша айындағы Ұлттар лигасы матчтарына арналған түпкілікті тізіміне де енген жоқ.
Осылайша, қазақстандық шабуылшының Фабио Челестинидің жетекшілігіндегі алғашқы ойыны қашан өтетіні белгісіз күйінде қалып отыр. Қазір басты міндет – бұған дейінгі жарақатынан енді ғана айыққан жас футболшының толық қалпына келуін қамтамасыз ету.
