«Бавария» Чемпиондар лигасындағы матч алдында нағыз апатқа тап болды
Мюнхендік «Бавария» Мадридтің «Атлетикосына» қарсы Чемпиондар лигасындағы матч қарсаңында күрделі кадрлық дағдарысқа тап болды, деп хабарлайды Sports24.kz.
Дортмундтың «Боруссиясымен» 2:2 есебімен тең түскеннен кейін неміс грандының жарақат алған футболшыларының тізімі айтарлықтай толықты.
Ең ауыр жарақатты Исмаэль Сайбари алды. Марокколық жартылай қорғаушы тобық байламы үзілгендіктен ота жасатты және шамамен үш айға қатардан шықты.
Тағы бір маңызды жоғалту Серж Гнабри болды. Неміс қанат шабуылшысы жамбас бұлшықетінен жарақат алып, соңғы ақпаратқа сәйкес, 2026 жылы енді алаңға шықпайды.
Сонымен қатар, мюнхендіктердің лазаретінде бұған дейін Джамал Мусиала мен Луис Диас болған. Екі футболшы да доппен жеке жаттығуларға кірісті, алайда әзірге алаңға оралуға дайын емес.
Михаэль Олисе мен Мануэль Нойердің матчқа қатысуы да сұрақ астында қалған еді. Дегенмен, екі ойыншы да 2 қарашада командалық жаттығуға қатысты. Бұл олардың «Атлетикоға» қарсы ойнау мүмкіндігін арттырды.
Жағдайға денсаулығына байланысты мәселелерден кейін қалпына келуін жалғастырып жатқан бас бапкер Венсан Компаниның жоқтығы да кері әсерін тигізуде. Команданы уақытша оның көмекшісі Аарон Дэнкс басқарып жүр.
Осылайша, еурокубоктағы аса маңызды қарсыластық қарсаңында «Бавария» шабуыл шебіндегі бірден төрт негізгі футболшысынан айырылуы мүмкін.
«Атлетико» — «Бавария» матчы 3 қарашада Мадридте өтеді.
